«Ռոսբալտ» ռուսաստանյան հրատարակությունը հաղորդել է, որ Հայաստանի իշխանությունները ազատ են արձակել նախկին հատուկջոկատային Նիկիտա Բելյանկինի սպանության մեջ կասկածվող Գրիգոր Օհանյանին, որը 2019-ի հունիսի 1-ից Հայաստանում է:
«Ռուսաստանում նախաքննության ընթացքում եզրակացրել են, որ նա կարող է հանցագործության մասնակից լինել: Օհանյանի նկատմամբ հետախուզում է հայտարարվել, Երևան է ուղարկվել միջազգային-իրավական հանձնարարություն: Օհանյանին բերման են ենթարկել բացատրության համար: Քանի որ տղամարդը Հայաստանի քաղաքացի է, նա չի կարող հանձնվել ՌԴ-ին: Այն բանից հետո, երբ ռեստորանի տերը առավելագույն քառասուն օր է անցկացրել կալանքի տակ, նրան ազատ են արձակել: Նախաքննության ավարտից հետո Ռուսաստանի ՔԿ-ն կարող է Օհանյանի նկատմամբ նյութն առանձնացնել և ուղարկել Երևան: Այն կքննեն արդեն Երևանում»,- գրել է հրատարակությունը:
Նշվում է, որ Օհանյանը Մոսկվայի մարզի Պուտիլկովո գյուղի «Բիր հաուս» ռեստորանի սեփականատերն է, որի մոտ տեղի է ունեցել սպանությունը: Հայաստանում հետաքննության ընթացքում նա շարադրել է տեղի ունեցածի մասին իր վարկածը:
