Ռուսաստանի նախագահ Վլադիմիր Պուտինը թուրք պաշտոնակից Ռեջեփ Թայիփ Էրդողանին հրավիրել է աշխատանքային այց կատարել Ռուսաստան: Ըստ Կրեմլի մամուլի ծառայության հաղորդագրության, Թուրքիայի առաջնորդն ընդունել է իր ռուս պաշտոնակցի հրավերը:
Երկու երկրների ղեկավարները հեռախոսազրույցի ընթացքում քննարկել են մի շարք հարցեր, անդրադարձել նաև Սիրիայի հյուսիսում տիրող իրադրությանը: Ռուսաստանի և Թուրքիայի նախագահները կարևորել են թուրքական բանակի ստորաբաժանումների և Սիրիայի կառավարության զինված ուժերի միջև բախումների կանխման անհրաժեշտությունը: Բացի այդ, ըստ հաղորդագրության, զրուցակիցները հանդես են եկել Սիրիայում քաղաքական կարգավորման գործընթացի շարունակման օգտին և մտադրություն են հայտնել նպաստել ՄԱԿ-ի հովանու ներքու հոկտեմբերի վերջին Ժնևում Սահմանադրական կոմիտեի նիստի գումարմանը:
