Վաշինգտոնում ԱՄՆ նախագահ Դոնալդ Թրամփը Սպիտակ տանը խոսել է կորոնավիրուսի դեմ պայքարում իշխանության գործադրած նոր միջոցառումների մասին, հայտնում է CNN-ը։
Թրամփը հայտարարել է, որ կորոնավիրուսի տարածումը զսպելու համար դաշնային իշխանության մակարդակով սահմանված արգելքները, այդ թվում՝ սոցիալական հեռավորության պահանջը, կերկարաձգվեն մինչև ապրիլի վերջ:
Լրագրողների հետ հանդիպմանը մասնակցել են փոխնախագահ Մայք Փենսը, Ալերգիայի և վարակիչ հիվանդությունների ազգային ինստիտուտի տնօրեն դոկտոր Էնթոնի Ֆաուչին, կորոնավիրուսի դեմ պայքարի հարցով Սպիտակ տան հատուկ հանձնախմբի համակարգող, նախկինում բժիշկ և դիվանագետ Դեբորա Բիրքսը և բարձրաստիճան այլ պաշտոնյաներ:
«Մենք երկարաձգում ենք մեր հանձնարարականները մինչև ապրիլի 30-ը, մենք կարող ենք ակնկալել, որ մինչև հունիսի 1-ը արդեն կլինենք վերականգնման ճանապարհին», — հայտարարել է ԱՄՆ ղեկավարը:
Էնթոնի Ֆաուչին հայտնել է, որ համավարակը Միացյալ Նահանգներում գագաթնակետին կհասնի առաջիկա երկու շաբաթվա ընթացքում: Այս պայմաններում չի բացառվում, որ Ամերիկայում կորոնավիրուսի հարուցած թոքաբորբից կմահանա 100-ից մինչև 200 հազար մարդ: Թվերն, իհարկե, ճնշող են, բայց է’լ ավելի աղաղակող է պատկերը, որը հնարավոր կլինի արտակարգ միջոցներ չձեռնարկելու պարագայում. այդ դեպքում մասնագետները չեն բացառում Covid 19-ից մեկևկեսից մինչև երկու միլիոն երկու հարյուր հազար զոհեր ունենալու վտանգի մասին:
«Խոսում եք 2 միլիոն 200 հազար մահերի մասին, 2 միլիոն 200 հազար, եթե մենք կարողանանք այս թիվն իջեցնել, ասենք, մինչև 100 հազար, ինչն իհարկե ինքնին սարսափելի է, 100 հազար կամ ավելի քիչ, կամ 100-ից 200 հազար, ես կասեմ, որ մենք բոլորս միասին շատ լավ ենք աշխատել, միայն պատկերացրեք՝ հնարավոր է 2 միլիոն 200 հազար», — ասել է Թրամփը:
Թրամփն ընդգծել է, որ բանակի շինարարների ջանքերով Նյու Յորքում չորս օրում կառուցվել է 2 հազար 900 մահճակալով հիվանդանոց, տարբեր նահանգներ ստացել են թոքերի օդափոխության հազարավոր համակարգեր, կիրառվում են բուժման էքսպերիմենտալ մեթոդներ։
