Հայաստանի պետական տնտեսագիտական համալսարանի (ՀՊՏՀ) ուսանողները դասադուլ են անում եւ պահանջում նախկին ռեկտոր Ռուբեն Հայրապետյանի վերադարձը: Նրանք երեկ հայտարարել էին, որ ռեկտորի ժամանակավոր պաշտոնակատար Դիանա Գալոյանի գիտական աշխատանքներում կա արտագրություն:
Araratnews.am-ը զանգահարեց բարձրագույն որակավորման կոմիտեի նախագահ Սմբատ Գոգյանին՝ տեղեկանալու, թե ուսումնասիրելո՞ւ են Դիանա Գալոյանի գիտական աշխատանքները՝ իմանալու կա՞ արտագրություն, թե՞ ոչ:
Ի պատասխան Սմբատ Գոգյանն ասաց, որ վարչապետից հրահանգ ստանալուց հետո կարող են միայն ուսումնասիրություն սկսել, ինչպես դա եղել է Ռուբեն Հայրապետյանի՝ ՀՊՏՀ նախկին ռեկտորի ժամանակավոր պաշտոնակատարի եւ Երեւանի ճարտարապետության եւ շինարարության համալսարանի ռեկտոր Գագիկ Գալստյանի դեպքում:
Ինչ է Սմբատ Գոգյանի կարծիքը Դիանա Գալոյանի գիտական աշխատանքներում արտագրության հայտարարության մասին: «Ես շատ չեմ խորացել: Ինչ էլ տեսել եմ, կտորներ են: Պետք է մի քիչ ուշադիր նայել: Մեզ մոտ հիմա ծանր գրաֆիկ է»,- ասաց Գոգյանը:
ԲՈԿ-ի նախագահը հիշեցրեց՝ առանց վարչապետի հրահանգի ուսումնասիրում են մասնագիտական խորհուրդներն ու նրանց անդամների գիտական աշխատանքները: «Ուրբաթ օրը մերժել ենք մեկի ատենախոսությունը եւ փակել մեկ մասնագիտական խորհուրդ՝ անդամների գիտական աշխատությունների արտագրության պատճառով»,- ասաց ԲՈԿ-ի նախագահը:
Թե որ մասնագիտական խորհրդի է եւ ում ատենախոսության մասին է խոսքը, Սմբատ Գոգյանը չասաց՝ մարդկանց վատ վիճակում չեն ցանկանում դնել:
Սոնա Դավթյան
