Ուկրաինայի ներքին գործերի նախարար Յուրի Զախարչենկոն հայտնվել է այն անձանց ցուցակում, որոնց ԱՄՆ կառավարությունը կարող է թույլ չտալ մուտք գործել ԱՄՆ տարածք, ինչպես նաև պատժամիջոցներ կիրառել նրանց դեմ։ Այս մասին հաղորդում է «Ուկրաինսկայա պրավդա»-ն։
Վաշինգտոնի աղբյուրները նշում են, որ այդ ցուցակում արդեն կա 10-20 անուն, ովքեր այս կամ այն կերպ ներգրավված են Եվրամայդանի մասնակիցների դեմ ուժի կիրառմանը։ Չորեքշաբթի օրն ԱՄՆ սենատում պետք է կայանան արտահերթ լսումներ, որտեղ քննարկվելու է Ուկրաինայի ներքաղաքական ճգնաժամը։ Բացի այդ, ԱՄՆ նախկին պետքարտուղար Հիլարի Քլինթոնի տեղակալ Մելանի Վիրվիրն ասել է, որ ԱՄՆ ղեկավարությունն ակտիվ քննարկում է պատժամիջոցներ կիրառելու հարցը։
