Այսօր ապրիլյան պատերազմում զոհված ավագ լեյտենանտ Տիգրան Պողոսյանի ծննդյան օրն է: Հերոսը կդառնար 28 տարեկան:
Տիգրանը ծնունդով Հոռոմ գյուղից էր: 2014 թ. Վազգեն Սարգսյանի անվան ռազմական համալսարանն ավարտելուց հետո անցել էր սպայական ծառայության՝ Արցախում` Մարտակերտում: Մայրը՝ տիկին Սիլվան, պատմում է, որ Տիգրանը ժիր տղա էր: Սպորտով էր զբաղվում, մի քիչ չարաճճի էր, բայց ինչ անում էր՝ հումորով էր անում: Երբ որոշեց, որ պիտի սպա դառնա, մայրը միանգամից համաձայնություն տվեց: Ասում է` Տիգրանիս համազգեստ շատ էր սազում: Եթե տղայի մտքով անցել է, սիրում է` ուրեմն պիտի գնա իր երազանքի հետևից: Գնաց…
Զինակից ընկերոջ կյանքը փրկելով՝ հերոսաբար զոհվեց Տիգրանը:
Այսօր մայրաքաղաքում մի շարք միջոցառումներ են տեղի ունենալու՝ նվիրված հերոսի հիշատակին:
Երևանի թիվ 40 դպրոցում տեղի է ունեցել հուշ-ցերեկույթ՝ նվիրված Տիգրան Պողոսյանին: Միջոցառմանը ներկա են եղել Հերոսի հարազատները, մարտական ընկերները, զինվորականներ, հյուրեր:
Տիգրան Պողոսյանի հարազատները միջոցառումից հետո կայցելեն Հայրենիքի պաշտպանի վերականգնողական կենտրոն: Իսկ երեկոյան ժամը 19:00-ին «Էլիտ պլազա» բիզնես կենտրոնում տեղի կունենա Վարդուհի Գասպարյանի «Մի կտոր հաղթանակ» վերտառությամբ գրքի շնորհանդեսը՝ նվիրված Տիգրան Պողոսյանին:
Հայկ Մագոյան
