Հայտնի դերասան Սերգեյ Դանիելյանը, օրերս շրջելով Երևանի փողոցներով, մարդկանց հորդորում էր դիմակ կրել, պահպանել սոցիալական հեռավարություն և կատարել պարետի որոշումները:
Ամբողջ աշխարհում ակցիաներով, տարբեր նախաձեռնություններով, տեսաուղերձներով և օնլայն համերգներով մտավորականները, արվեստագետներն ու հանրային մարդիկ կոչ են անում պահպանել համակեցության կանոնները, որպեսզի աշխարհը օր առաջ ազատվի վիրուսի ճիրաններից:
Սերգեյ Դանիելյանը այն արվեստագետներից է, որն իր պարտքն է համարել մարդկանց իրազեկել, որ հանրային առողջության պահպանումը կախված է ցանկացած մարդու պատասխանատվությունից:
Araratnews.am-ը այս և այլ հարցերի շուրջ զրուցել է հայտնի դերասանի հետ:
Մարդկանց իրազեկելու նախաձեռնության մասին Սերգեյ Դանիելյանն ասում է, որ հանրության շրջանում բավականին ոգևորություն է նկատել և լավ տպավորություններ է ստացել:
«Մարդիկ լսում էին, գիտակցում էին ու ընդունում, որ կանոնների պահպանումը շատ կարևոր է»,- ասում է նա:
Մենք դերասանից հետաքրքրվեցինք, թե որպես արվետագետ և որպես ՀՀ քաղաքացի, ինչպես է գնահատում կառավարության և գործող իշխանության կատարած քայլերը կորոնավիրուսի դեմ պայքարում և առհասարակ:
«Գործող իշխանության քայլերը կգնահատեմ բավարար: Այս իշխանությունը իրենից կախված ամեն ինչ անում է: Բնականաբար, պետք է նկատեմ, որ այս իշխանությունը և աշխարհում ոչ մի իշխանություն պատրաստ չէր վիրուսին ու հատկապես այսպիսի մասշտաբներով»:
Դերասան Սերգեյ Դանիելյանը կարծում է, որ պետք է սովորել ապրել կորոնավիրուսի հետ, քանի որ անընդհատ սահմանափակված մնալ հնարավոր չէ:
«Ես կարծում եմ` ճիշտ են արել, որ սահմանփակումները հանել են, որովհետև պետք է կամաց-կամաց սովորել ապրել վիրուսի հետ: Երևի պետք է բոլորս վարակվենք պրծնենք: Ճիշտ է, ես վիրուսոլոգ չեմ, բայց տանը նստելով էլ բան դուրս չի գա»,- կեսկատակ-կեսլուրջ ասում է դերասանը:
Վերջին շրջանում երկրում տեղի ունեցող քաղաքական գործընթացներին ու գործող իշխանության դեմ կատարած քայլերին, կորոնավիրուսին քաղաքական աստառ կպցնողներին և նախկինների պահվածքին Սերգեյ Դանիելյանը բավականին կոշտ գնահատական տվեց:
«Ընդհանրապես, կորոնավիրուսով պայմանավորված՝ խնդիրը քաղաքականացնելու համար պետք է պոռնիկի ծնունդ լինել: Ովքեր քաղաքական դիվիդենտներ են քաղում, նրանք պոռնիկի ծնունդ են: Ես դրանից ավել բան չեմ կարող ասել: Նրանք, ովքեր ուզում են քաղաքականացնել այս ամենը, երրորդ անգամ չասեմ, թե ինչ են»:
Հայկ Մագոյան
