Ամուլսարի վերաբերյալ քրեական գործի նախաքննությունը շարունակվում է, քանի որ վերջին շրջանում ի հայտ են եկել նոր տեղեկություններ: Թե կոնկրետ ի՞նչ տեղեկությունների կամ ի՞նչ անունների մասին է խոսքը, ՀՀ Քննչական կոմիտեի նախագահի տեղակալ, Ամուլսարի վերաբերյալ քրեական գործով քննչական խմբի ղեկավար Արսեն Այվազյանը խուսափողական պատասխան հնչեցրեց:
«Թույլ տվեք այս պահին իրավական գնահատականներ չտալ։ Պարզապես կարող եմ ասել, որ նախաքննությունը շարունակվում է, որի հիման վրա առաջիկայում հստակ տեղեկություն կփոխանցվի»։
Լրագրողների հարցին, թե արդյոք ի հայտ եկած նոր տեղեկությունները կարող են լինել քննչական խմբի նախկին ղեկավար Յուրա Իվանյանի կողմից թաքցված տեղեկությունները, Այվազյանը հստակ պատասխան չտվեց:
Հիշեցնենք՝ ՀՀ քննչական կոմիտեի ՀԿԳ քննության գլխավոր վարչությունում հարուցվել էր քրեական գործ՝ ՀՀ բնապահպանության նախարարության պաշտոնատար անձանց կողմից շրջակա միջավայրի աղտոտման մասին տեղեկությունները դիտավորությամբ թաքցնելու առերևույթ դեպքի առթիվ։
