ՀՀ Նախագահի աշխատակազմին մոտ կանգնած մեր աղբյուրների փոխանցմամբ Նոյեմբերի 5-ին հաջորդած գիշերը աննախադեպ ծանր էր Բաղրամյան 26-ի համար: Շանթ Հարությունյանի հեղափոխության փորձի մասին ամինջապես զեկուցել են Սերժ Սարգսյանին, ով, գիտակցելով իրավիճակի ծանրությունն ու անկանխատեսելիությունը, հետևում էր դեպքերի զարգացմանը: Մեր աղբյուրի փոխանցմամբ, աշխատակազմի մեծ մասը կեսգիշերն անց դեռ Բաղրամյան 26-ում էր, իսկ առավել հանգուցային աշխատողները տուն գնացին գիշերը ժամը 3-ին:
Մինչեւ կեսգիշեր նստավայրում սպասում էին դեպքերի անկանխատեսելի զարգացման, խստացված էր շենքի անվտանգությունը: Ըստ աղբյուրի, ով ցանկացավ գաղտնի մնալ, նախագահի աշխատակազմի բազմաթիվ աշխատակիցներ վախենում էին, որ հեղափոխականների կողմից՝ Բաղրամյան 26-ի վրա գրոհի դեպքում, կարող են ընկնել զայրացած ընդդիմադիրների ձեռքի տակ: Տիրող «հատուկ ռեժիմն» դադարեց միայն գիշերվա ժամը 1-ից հետո, երբ պարզ դարձավ, որ հեղափոխության փորձին շարունակություն չի հետևելու:
Մտածել, որ այդ ամբողջ իրարանցումը առաջացել էր միայն Շանթ Հարությունյանի սկսած հեղափոխությունից` պարզամտություն կլիներ, քանի որ վերջինս իր ծրագրերի մասին խոսում էր պարզ, իսկ վարչախմբին հաջողվել էր գործակալների միջոցով ամբողջովին վերահսկելի դարձնել հետագա գործողությունները: Իհարկե, Շանթի արարքը ռեզոնանս առաջացրեց հանրության մեջ, սակայն դա իր դրսևորումները կարող էր ունենալ ավելի ուշ, բայց ոչ վստահաբար այդ օրը: Հիմնական կոնսոլիդացիան տեղի էր ունեցել ոստիկանության մոտ, որի մասնակիցների թվաքանակը հազիվ թե վախեցներ Սերժ Սարգսյանին: Ակնհայտ է, որ վարչախումբը, մասնավորապես` Սերժ Սարգսյանը, այս պահին վտանգ է զգում մեկ այլ կողմից: Հաշվի առնելով սեպտեմբերի 3-ի նրա հայտարարությունը և դրանից հետո հապշտապ մաքսային միություն մտնելու փորձերը, կարծես հասկանալի է դառնում Բաղրամյան 26-ի անհանգստությունը նոյեմբերի 5-ի լույս 6-ի գիշերը: Շանթ Հարությունյանի սկսած հեղափոխությունը կարող էին «շարունակել» կամ օգտվել ստեղծված իրավիճակից Շանթի հետ առնչություն չունեցող բոլորովին այլ ուժեր, անգամ` նախկին կամ ներկա դաշնակիցներ: Դրա համար կան թե՛ ներքին, թե՛ արտաքին նախադրյալներ: Սերժ Սարգսյանի դիրքերը այս պահին թույլ են ավելի քան երբեք: Ռեսուրսների սահմանափակության հետևանքով վերջինս այլևս չի կարողանում կատարել հարցերը կարգավորող պախանի դերը: Խնդիր կա կուտակված կապիտալի վերաբաշխման:
Արտաքին տեսանկյունից նա լավագույն տարբերակը չէ անգամ Կրեմլի համար, իսկ Արևմուտքը վստահաբար նրան այլևս չի համարում վստահելի գործընկեր: Այսպիսով Բաղրամյան 26-ում վտանգ են զգում ցանկացած կողմից` ինչն էլ նոյեմբերի 5-ի գիշերը բերել էր նման անկանխատեսելիության:
