ՀՀ վարչապետ Նիկոլ Փաշինյանն այսօր կառավարության նիստում Տնտեսական մրցակության պաշտպանության պետական հանձնաժողովի նախագահին հարցրեց՝ ինչ է կատարվում շուկայում, արդյոք գնաճ կա:
Ի պատասխան ՏՄՊՊՀ ղեկավար Գեղամ Գեւորգյանն ասաց, որ ամենօրյա մոնիթորինգ են անում մայրաքաղաքում, մարզերում, խոշոր առեւտրային ցանցերում: Գների նվազման որոշակի միտում է նկատվում մարտի համեմատ: Բայց գների աճման միտումը 1-4 տոկոսի սանդղակում է:
ՏՄՊՊՀ ղեկավարն ասաց, որ վարույթներ են սկսել՝ շաքարավազ, կարագ, հավի ձու: Ձեթի, հավի մսի, ցորենի ալյուրի հետ կապված ուսումնասիրություն է սկսվել:
Գեղամ Գեւորգյանն ասաց, որ Հայաստանի շուկայում կա մրցակցություն: «Բենզինի ու դիզելի գներն էլ ասեմ՝ 310, 330: 370 դրամ արժե դիզելը: Իսկ անցյալ տարի դրանց գինը եղել է 450, 460, 470 դրամ: Մարզերում եւս նույն տրամաբանությունն է»,- ասաց ՏՄՊՊՀ ղեկավարը:
