Վարչապետ Նիկոլ Փաշինյանի ամանորյա ուղերձը հեռարձակվելու է Հանրապետության հրապարակից: Այս մասին հայտնել է Երեւանի փոխքաղաքապետ Տիգրան Վիրաբյանը: Այսինքն՝ վարչապետը տարին դիմավորելու է հրապարակում՝ շատերի հետ միասին:
Քաղաքապետի տեղակալը լրագրողների հետ հանդիպման ժամանակ նաեւ ներկայացրել է տոնական ծրագիրը: Ըստ նրա, ժամը 22-ից հայ արտիստները կկատարեն իրենց լավագույն ստեղծագործությունները: Կլինի նաեւ երգի պրեմիերա, որը Գարիկ Պապոյանն ու Սոնա Ռուբենյանը գրել են հատուկ «Երեւան-2020» ամանորյա ծրագրերի համար:
Համերգը կշարունակվի մինչեւ ժամը 23:45: Շնորհավորական ուղերձներով ընդմիջվելուց հետո երաժշտական միջոցառումները կվերսկսվեն: «Գորան Բրեգովիչը եւ իր նվագախումբը ընտրված երգացանկով խելահեղ համերգ կպարգեւեն մեզ»,- ասել է Տիգրան Վիրաբյանը: Նաեւ նշել է, որ տոնական միջոցառումը կշարունակվի մինչեւ լուսաբաց:
