ՆԱՏՕ-ի գլխավոր քարտուղար Անդրես ֆոգ Ռասմուսենը գոհ է մնացել «Արևելյան գործընկերության» գագաթնաժողովից, որը կայացել է Լիտվայի մայրաքաղաք Վիլնյուսում: Ռասմուսենը շնորհավորել է Ադրբեջանին, Վրաստանին և Մոլդովային՝ Եվրամիության հետ մերձենալու կապակցությամբ: Այս մասին ասվում է գլխավոր քարտուղարի տարածած հայտարարության մեջ:
«Ես ողջունում եմ Վիլնյուսում կայացած «Արևելյան գործընկերության արդյունքները»: Շնորհավորում եմ Ադրբեջանին, Վրաստանին և Մոլդովային՝ Եվրամիության հետ հարաբերություններում քաջաբար, լուրջ աշխատանքի միտումով և հաստատակամորեն կատարած իրենց ինքնիշխան ընտրության կապակցությամբ»,- այս մասին գրել է գլխավոր քարտուղարը:
Հայտարարության մեջ Ռասմուսենը որևէ անդրադարձ չի կատարել ասոցացման մասին համաձայնագրերի ստորագրումից հրաժարված Հայաստանի և Ուկրաինայի մասին:
Հիշեցնենք, որ երեկ Մոլդովան և Վրաստանը պաշտոնապես նախաստորագրել են ասոցացման մասին համաձայնագրերը, իսկ Ադրբեջանը ստորագրել է վիզային ռեժիմը դյուրացնելու մասին համաձայնագիր:
