Ուկրաինայի նախկին նախագահ Վիկտոր Յուշչենկոն հեղինակավոր The Financial Times թերթում տպագրված իր հոդվածում դիմել է Եվրոպային՝ փրկելու Ուկրաինան կայսերական մղձավանջից։
Նախկին նախագահը գրում է, որ ուկրաինացիներն արդեն հայտնել են իրենց աջակցությունը եվրաինտեգրմանը։ Իսկ ասոցացման մասին պայմանագրի ստորագրումը երկարատև քայլ է աշխարհաքաղաքական առումով, այն թույլ կտա ամրապնդել ժողովրդավարությունը Եվրոպայում և վերականգնել պատմական արդարությունը Ուկրաինայում՝ որպես եվրոպական պետություն։
Յուշչենկոն նշում է, որ Ռուսաստանը ձգտում է վերականգնել խորհրդային մոդելը մաքսային միության կամ եվրասիական տնտեսական տարածքի տեսքով, սակայն այդ կառույցներն ունեն մեկ նպատակ՝ Ռուսաստանին հանձնել ինքնիշխանությունը և կոտրել Ռուսաստանի հարևանների մրցունակությունն արտադրական ոլորտներում։
Յուշչենկոն մեղադրել է Եվրոպային, որ Ռուսաստանի ճնշմանը Եվրոպան չպատասխանեց համապատասխան տնտեսական աջակցությամբ։ Ըստ նրա՝ Եվրոպան պետք է տնտեսական օգնություն ցուցաբերի Ուկրաինային և դատապարտի Ռուսաստանի անթույլատրելի գործողությունները։ Յուշչենկոն Ուկրաինայի անդամակցությունը Մաքսային միությանը դիտում է որպես վատագույն սցենար ուկրաինացիների, նրանց պետության և Եվրամիության համար, որպես ժողովրդավարության և կայունության տարածքի հանդեպ ոտնձգություն։
