Այսօր Երեւանում այլեւս հիշելու անկյուն չունենք, չկա հուշարձան որ աղավաղված չլինի: Այսօր այս մասին լրագրողների հետ հանդիպմանը ասաց ճարտարապետ, Հանրային խորհրդի անդամ Սաշուր Քալաշյանը:
Անդրադառնալով Զվարթնոց օդանավակայանի կլոր շենքը քանդելու հարցինˋ ճարտարապետը նշում է, որ Հանրային խորհրդում անցկացված քննարկումների արդյունքում որոշվել էր այդ հարցը օրակարգից հանել:
Սակայն կառավարությունը հավանություն է տվել սեփականատիրոջ կողմից ներկայացված ծրագրին, որի մեջ խոսվում է Զվարթնոցի շենքը քանդելու մասին:
«Ես ցավում եմ, որ կառավարության շարքերում մտավորականության ներկայացուցիչներ չկան: Կառավարության հավանություն տալուց հետո մենք անմիջապես նամակ գրեցինք 50 մասնագետների կողմից ստորագրված: Մեկը ուղարկեցինք նախագահին, մյուսըˋ Էռնեկյանին, սակայն որեւէ արձագանք չկա»,- ասաց Քալաշյանը:
Ճարտարապետ Արտակ Ղուլյանը կարծում է, որ չի կարելի որեւէ ճարտարապետական կառույց քանդել, դրա փոխարեն չկարողանալով կառուցել ավելի լավը:
«Մենք օդանավակայանի շենքից հետո այս 20 տարվա ընթացքում կառուցե՞լ ենք այնպիսի շենք, որ Զվարթնոցից լավը լինի: Չենք կառուցել»,- հավելում է Ղուլյանը:
