«Ապօրինի որդեգրումների գործով մայրերի և փաստաբանների ասուլիսի» ընթացքում մայրերից Գայանե Հարությունյանը նշեց, որ ծննդաբերության ընթացքում ինքը երեխայի ճիչը չի լսել, քանի որ իրեն ընդհանուր նարկոզ են տվել: Հետո ասել են, որ երեխան մահացել է. «Սառնարանը բացել են ու մայրիկիս կապտած, սևացած մսագունդ ցույց տվել: Դիահերձարանում արդեն փարթամ, սպիտակամորթ երեխայի դի են ցույց տվել: Մի ամիս հետո դիմել ենք ոստիկանություն. ես, մայրիկս և ամուսինս դիմեցինք»:
Գայանե Հարությունյանը բժշկական կոնսիլիում է պահանջել:
«Ոստիկանությունից մեզ կանչում ու ասում են, որ կոնսիլիումը եղել է: Մեզ թղթեր չտվեցին, որտեղ գրված լիներ, որ այս-այս փաստերով բժիշկը սխալ չէ»,- ասաց Գայանե Հարությունյանը:
Նա հավելեց, որ ԶԱԳՍ-ում երեխայի տվյալները սխալ են գրանցած եղել: Իր բժշկական պատմության մեջ էլ ոչ մի փաստաթղթում գլխավոր բժշկի ստորագրություն չի եղել: Փաստաթղթերում երեխայի մահվան պատճառը գրված չի եղել:
«Մի փաստաթղթում ես 25 տարեկան եմ, մյուսում՝ 24»,- հավելեց Գայանե Հարությունյանը:
