Այսօր ԳԱԼԱ-ին է դիմել Գյումրու բնակչուհի Գոհար Խաչատրյանը, ով դժգոհում էր, որ իր հիվանդ որդուն բանակ են զորակոչում այն բանի համար, որ ինքը չի կարողացել անհրաժեշտ գումար տալ: Նա ասաց, որ մի քանի օր առաջ նրան հավաստիացրել են, որ տղան խնդիրներ ունի հոգեկան առողջության հետ կապված, դրա համար պիտանի չէ ծառայության համար: Սակայն այսօր արդեն տեղեկացրել են, որ որդուն ճանապարհելու են բանակ:
«Երեխին մինչեւ անգամ հոգեբուժարան ուղարկեցին, ներվերի պրոբլեմ ունի, աչքերը 10 տոկոս չի տեսնում, սրտի պրոբլեմ էլ ունի: Ներկա պահին մայրս մտել է ներս, վիճաբանում է բժիշկների հետ, որովհետեւ նրան ասել են՝ գումար չտվին, դրա համար ներկա պահին կգնա բանակ: Ներվային բժիշկն է այդ մասին ասել»,-փոխանցեց ապագա զինակոչիկի՝ Զիլֆիմյան Սամվելի քույրը:
Ավելի ուշ մենք զրուցեցինք նաեւ մոր՝ Գոհար Խաչատրյանի հետ, ով ասաց, որ տղան մանկուց խնդիրներ է ունեցել, 8 տարի մանկատան սան է եղել, եւ բոլորը գիտեն այն մասին, որ Սամվելը հիվանդ է:
«Իմ երեխայի ներվային սիստեմը մանկուց խանգարված է, ինքը նաեւ կակազելով է խոսում, սրտի խնդիրներ ունի: Մենք եկանք զինկոմ տեղյակ պահեցինք, ստուգեցին, ներվային բժիշկը ուղարկեց Երեւան հոգեբուժարան, 3 օր մնաց կոմիսիա արեցին, այնտեղից փախել է երեխան: Նոր էլ մեզ ասել են, որ հմի պիտի տանեն, ես միամիտ լսեցի բժիշկների խոսակցությունը, մեկը մյուսի հետ խոսում էր, ասում էին` հախը չտվավ, եթե հախը տար, չէին տանի: Այդ մասին ներվային բժիշկը ասաց վիրաբույժին: Ես էլ միանգամից ասացի՝ եթե փող չունեմ, պտի իմ հիվանդ երեխային տանե՞ք, հա… ու վիճաբանություն սկսվեց:
Ես գիտեմ, որ իմ երեխան բանակի բան չէ: Նա տանը մեզ հետ նույնիսկ չի կարող յոլա գնալ, ամեն ինչ կոտրել է, փշրել… հիմա սրա ձեռքը զենք տան, նա ի՞նչ կանի: Նա կամ մարդ կսպանի, կամ իրեն կսպանի, հասկացեք, հիվանդ երեխային չի կարելի բանակ զորակոչել: Մենք մինչեւ այսօր բոլորս էլ գիտեցել ենք, որ «նիգոդնի» է Սամվելիկը, բայց այսօր միանգամից որոշել են՝ տանում են»,-ասաց տիկին Գոհարը:
Նա ասաց, որ մինչեւ վերջ բողոքելու եւ հաստատելու է, որ որդին պիտանի չէ ծառայության համար:
«Ինքը չի հասկանում: Ինքը մանկատանն է եղել: 8 տարի մանկատանն է ապրել, 8-րդը չի ավարտել, հայրը 7 տարի է՝ անհայտ կորած է, մանկատունն է մեծացել իմ երեխաս:
Իրա հետ հեչ մարրդ չի կարող խոսա, շուտ կբռնկվի: Ինքը միշտ էլ ասել է` ես գնացի` ինձի կկրակեմ, ինքը այդ վախով է: Կսե` իմ ներվերս հանեցին` կկրակեմ»:
Տիկինը ասաց նաեւ, որ ոչ մի անգամ տղան չի բուժվել եւ որևէ փաստաթուղթ էլ չունի: Բայց բակում, դպրոցում ու մանկատանը բոլորն էլ Սամվելին գիտեն որպես հիվանդ երեխա:
ԳԱԼԱ-ն զրուցեց նաեւ «Հույս» մանկատան գործադիր տնօրեն Անահիտ Կարապետյանի հետ: Տիկին Կարապետյանը մեզ հետ զրույցում ասաց, որ Սամվել Զիլֆիմյանը բարդ երեխա է եղել. «Նա այո, շատ շուտ էր ներվայնանում եւ նաեւ այո, կակազում էր՝ հատկապես երբ ներվայնանում էր: Մենք նաեւ կապում էինք իրա բարդ տարիքի հետ, որ հասունացման շրջան էր եւայլն… բայց ասել՝ նա բանակի համար պիտանի էր, թե ոչ, իհարկե, ես չեմ կարող…»:
Մանրամասները` galatv.am — ում
