Այսօր Ազգային Ժողովիˋ արտահերթ նստաշրջանի օրակարգում քննարկվեց Պետական նպաստների մասին ՀՀ օրենքում փոփոխություններ եւ լրացումներ կատարելու մասին օրենքը:
ՀՅԴ պատգամավոր Արծվիկ Մինասյանը իր ելույթում հանդես եկավ մի քանի առաջարկություններովˋ օրենքում ներառելու համար:
«Այս օրենքը պետք է բերի աղքատության ծայրահեղ վիճակի իջեցում, բարելավում կամ մոտեցում այդ մակարդակին, ինչպես ասում է պարոն Հակոբյանը (Սոցիալական հարցերի մշտական հանձնաժողովի նախագահ Հակոբ Հակոբյան- հեղ.): Թույլ տվեք չհավատալ այդ ձեր ցուցանիշներին, որովհետեւ շատ պարզ է, որ ձեր վերցված թվերը հիմնված են աղքատության գնահատման մեթոդաբանության վրա եւ հաշվի չեն առնում նվազագույն սպառողական զամբյուղը»,-ասաց Մինասյանը:
Նա նշեց, որ այս օրենքով գնահատվում է ընտանիքների անապահովությունը, առանց հաշվի առնելու այդ ընտանիքների ամբողջ եկամուտները կամ այդ ընտանիքների կողմից կատարվող ծախսերը: Ըստ Արծվիկ Մինասյանի, անապահովության գնահատման համակարգը, հիմնված եկամուտների եւ որոշ ծախսերի անուղղակի ծախսերի վրա, արդարացիորեն չի արտացոլում այն իրական պատկերը, որը կա:
«Մենք պետք է փոխենք հաշվառման համակարգը: Մենք իդելական հաշվառման համակարգ կունենանք, եթե միայն եկամուտների ու ծախսերի ամբողջական հայտարարման ինստիտուտը ունենանք, մենք իհարկե լավ հաշվառման համակարգ կունենանք, եթե արդյունավետորեն հաշվարկենք ընտանիքի ինստիտուտը»,- ասում է Մինասյանը:
Նա հավելում է, որ եթե երեխայով է պայմանավորված նպաստի հանգամանքը, ապա դա օբյեկտիվ չափանիշ է, եւ դրա վրա պետք է կառուցվի ողջ քաղաքականությունը:
«Այլ բան, եթե ընտանիքը չունի այլ բավարար եկամուտներ եւ դրան ավելացվի հավելյալ նպաստների համակարգը, բայց բազան պետք է լինի երեխան: Սա օբյեկտիվ չափանիշ է, այլ ոչ թե նորից անապահովության գնահատաման համակարգ: Մեր կառավարությանը հատուկ է ամեն ինչ անել, կտրել ինչքան հնարավոր է ավելի շատ գումար: Առաջարկս հետեւյալն է. բերենք օրենքում դնենք այն պայմանները, որոնց ներքո կարող է ընտանեկան կապիտալը օգտագործվել: Դա կարող է լինել երեխայի ուսման վճարի համար, երեխայի պահպանման սննդի ծախսի, կամ բժշկական ծառայության մատուցման»,-ասում է Մինասյանը:
