Ղրիմի՝ Ռուսաստանի Դաշնությանը միանալուց հետո, որոշ քաղաքական գործիչներ սկսեցին կարծիք հայտնել, որ նույն ճանապարհով կարող է գնալ նաև Լեռնային Ղարաբաղի Հանրապետությունը: Քաղաքագետ Հմայակ Հովհաննիսյանն անգամ հայտարարել էր, որ ՌԴ կազմ մտնելու համար ԼՂՀ-ն իրավական հիմքեր ունի: Այդ տեսակետին է նաեւ 1993 թվականի պաշտպանության նախարար Նորատ Տեր-Գրիգորյանցը: Զարմանալի է, որ կան նաև անձիք, ովքեր պայքարելով Արցախի անկախացման համար, հիմա գտնում են, որ լավագույն լուծումը կլինի ՌԴ կազմ մտնելը:
Այս կապակցությամբ AraratNews.am-ը զրուցեց Արցախի հերոս Արկադի Տեր-Թադևոսյանի հետ: Գեներեալ Տեր-Թադևոսյանը այդ խոսակցությունները անհիմն է համարում և հիշեցնում նման մարդկանց, որ հայ ժողովուրդը չի պայքարել, որպեսզի ԼՂՀ-ն հայտնվի այլ երկրի կազմում.«Մենք չենք պայքարել, որպեսզի ԼՂՀ-ն հայտնվի այլ երկրի կազմում: Ղարաբաղը անգամ Հայաստանի կազմ չի մտել, այլ բռնել է անկախացման ճանապարհը: Այնպես որ, այդ խոսակցությունները անհիմն եմ համարում:Ես հիմա Ղարաբաղում եմ և այստեղ մարդիկ նման միտք անգամ չունեն: Մարդիկ ուրախանում են, որ ինքնորոշման իրավունքը աշխարհում սկսկում է տարածվել, բայց մտադրություն չունեն իրենց կարգավիճակը փոխարինելու»,-եզրափակեց իր խոսքը Արկադի Տեր-Թադևոսյանը:
