Մեծ Բրիտանիայի արտաքին գործերի նախարար Ուիլյամ Հեյգը հայտարարել է, որ իր երկիրը հույս ունի, որ ղարաբաղյան հակամարտության կարգավորման հարցով Հայաստանի և Ադրբեջանի նախագահների հանդիպումները կլինեն պարբերական և մշտական: Այս մասին նա ասել է Բաքվում կայացած մամուլի ասուլիսի ժամանակ: Հեյգն այսօր ներկա է գտնվել «Շահ Դենիզի» գազային հանքի երկրորդ նախագծի շահագործման մեկնարկին:
«Մենք ողջունում ենք Հայաստանի և Ադրբեջանի նախագահների վերջերս կայացած հանդիպումը և հույս ունենք, որ հանդիպումները կունենան շարունակական բնույթ», — ասել է Հեյգը: Այս մասին հաղորդում է Trend գործակալությունը:
Հիշեցնենք, որ անցած ամիս Սերժ Սարգսյանն ու Իլհամ Ալիևը, երկու տարվա ընդմիջումից հետո, բանակցություններ են անցկացրել Վիեննայում:
