ՀՀ-ում, արտակարգ դրության պայմաններում, բուհերն ու դպրոցները հեռավար ուսուցման են անցել: AraratNews.am-ն այս ընթացքում բազմիցս կապ է հաստատել հանրապետության քաղաքային ու գյուղական դպրոցների տնօրենների հետ՝ տեղեկանալու համար, թե ինչպես է ընթանում ուսումնական գործընթացը:
Պարզելու համար նվազե՞լ է արդյոք հեռավար ուսուցման ընթացքում ուսման վարձի չափը, AraratNews.am-ը կապ հաստատեց մասնավոր դպրոցների տնօրինությունների հետ:
«Հայ ասպետ» ԿԲՀ-ի միջնակարգ դպրոցի տնօրեն Կարին Տոնոյանը AraratNews.am-ի թղթակցի հետ զրույցում նշեց, որ հեռավար ուսուցման ընթացքում մասնավոր դպրոցի վարձի չափը չէր էլ կարող նույնը մնալ:
«Ես չգիտեմ, թե մյուս մասնավոր դպրոցներում ինչպես է, բայց մենք նաև սնունդ էինք տալիս աշակերտներին, որը հիմա չենք տալիս և այդ գումարները բնականաբար կրճատել ենք: Այս ամսից կկրճատենք նաև որոշակի փոքր հատված տնտեսական ծախսերի հիման վրա, որպեսզի ծնողների հոգսը մի փոքր էլ թեթևացնենք»,- ասաց Կարին Տոնոյանը:
«Հայ ասպետ» ԿԲՀ-ի միջնակարգ դպրոցում վարձավճարը կարող է տարբեր լինել. գերազանցիկներն այլ վարձ են վճարում, ծնողազուրկ աշակերտները՝ այլ, և այլն:
«Այբ» դպրոց
«Ուսում» դպրոցի տնօրեն Սուսաննա Թամարյանը AraratNews.am-ի թղթակցի հետ զրույցում նշեց, որ իրենց մոտ պայմանագրով ուսման վճարն ուսումնական տարվա համար է նախատեսված:
«Կան լրացուցիչ ծառայություններ, որոնք մենք հեռավար ուսուցման ժամանակ ընդհանրապես չենք իրականացնում: Չենք իրականացնում, ասենք, սննդի մատակարարումը, երեխաներին տրանսպորտով ապահովումը: Այդ ծառայությունների համար ծնողներն առանձին են վճարում: Հիմա ինչի՞ համար ենք մենք վարձն առայժմ նույնը պահել, որպեսզի ուսուցիչը վարձատրվի 100 տոկոսով: Տեխնիկական աշխատողներին նույնպես չենք կրճատել: Քանի որ մեզ մոտ ուսման վճարն ամսով չէ՝ տարով է, ուստի կիսամյակի վերջում «+-»-ը կանենք և կտեսնենք, թե ինչ է ստացվում: Շատ մարդիկ կան, ովքեր դեռ չեն վճարել, մենք նրանց ոչինչ չենք ասում՝ ընդամենը խնդրում ենք, որ ովքեր կարող են՝ վճարեն, որպեսզի այս օրերին մենք ճգնաժամի մեջ չընկնենք»,- ասաց Սուսաննա Թամարյանը:
«Ուսում» դպրոցի տնօրենն ընդգծեց, որ ներկայումս աշակերտների հետ դասապատրաստումն իրականացնում են ծնողները, սակայն դասապատրաստում իրականացնող ուսուցիչները նույնպես վարձատրվում են: Դպրոցի սպասարկման ոլորտի աշխատողները անցյալ ամիս վարձատրվել են և վարձատրվելու են:
Տնօրենի խոսքերով, ծնողները դեմ չեն, որ վերոնշյալ աշխատողները վարձատրվեն:
