Տավուշի մարզի Բերդ քաղաքի բնակիչ Սիրանույշ Մելիքյանը, ով սովորում է ԵՊՀ-ի միջազգային հարբերություններ բաժնում, Araratnews.am-ի հետ զրույցում նշում է, որ Շամշադինի շրջան մտնող երեք ճանապարհներից երկուսըˋ Պառավաքար-Վազաշեն եւ Բերդ- Ճամբարակ, խիստ վտանգավոր են կյանքի համար, իսկ երրորդըˋ Բերդ-Իծաքար-Գանձաքար-Իջեւան, ամբողջովին անբարեկարգ վիճակում է:
Հոկտեմբերին 22-ից հետո, երբ Պառավաքար-Վազաշեն ավտոճանապարհին ադրբեջանական կողմից հնչած կրակոցների հետեւանքով զոհվեց մեկ եւ վիրավորվեցին մի քանի զինծառայողներ մարտական ավտոմեքենաների շարասյունով ընթանալիս, փակվեց եւ մինչ օրս շարունակվում է փակ մնալ ռազմավարական նշանակություն ունեցող այդ ճանապարհը:
«Պառավաքար-Վազաշենը փակելուց հետո հիմա մնացել են Բերդ-Ճամբարակ եւ Իծաքար-Գանձաքար-Իջեւան ավտոճանապարհները: Բայց Բերդ-Ճամբարակը ունի 4 կմ ընդհանւր սահմանագիծ Արդբեջանի հետ եւ իր վտանգավորությամբ չի զիջում Պառավաքար-Վազաշեն ճանապարհին: Բացի այդ, սարից ինջող ձյունը անընդհատ փակում է ճանապարհը, ինչքան էլ այն մաքրեն, թույլ չի տալիս, որ բաց մնա»,-ասում է Սիրանույշ Մելիքյանը:
Տավուշի մարզի Շամշադինի շրջանից Երեւան եկող երրոդ ճանապարհըˋ Իծաքար-Գանձաքար-Իջեւանը, ինչպես նշում է Սիրանույշ Մելիքյանը, կառուցումից ի վեր չի բարեկարգվել, ամբողջովին գրունտային ճանապարհ է:
Այն միակն ճանապարհն է, որի կողմից ադրբեջանցիները դիտակետ չունեն, սակայն մարդիկ չեն կարողանում օգտագործել այդ ճանապարհը՝ անբարեկարգ լինելու եւ ձյան պատճառով:
«Դրա համար մենք պահանջում ենք, նախեւառաջ, որ առաջին իսկ հնարավորություն դեպքում վերականգնեն այդ ճանապարհը, որպեսզի բնակչությունը ազատ մուտք ու ելք ունենա: Այսօր առավոտյան այդ ճանապարհով տարածաշրջանից դուրս են եկել ընդամենը մի քանի մեքենա եւ Երեւան են հասել մի 7 ժամում, որ սովորաբար 3-4 ժամում են հասնում: Եթե մենք ուզում ենք տուն գնալ, տարածաշրջան մտող երեք ճանապարհներից ոչ մեկը չի կարող մեզ ապահով տուն հասցնել»,- ասում է Մելիքյանը:
Շամշադինի շրջանի 400-ից ավել ուսանողներ սովորում են Երեւանում եւ ձմեռային արձակուրդներին տուն վերադառնալու համար ճանապարհները մեծ խնդիրներ են ստեղծելու նրանց համար: Երիտասարդները նշում են, որ ավտոճանապարհների խնդրով առաջիկայում նախատեսվում է հանդիպում Տավուշի մարզպետի հետ:
«Կարեւոր խնդիր է նաեւ հիվանդների հարցը, որ ձմռանը պետք լինի հիվանդի տեղափոխել Երեւան, դա խնդիր է դառնում, այն էլ սահմանի, ուր չեն դադարում կրակոցները, մի վիրավոր զինվոր լինի, չեն կարա շտապ Երեւան հասցնեն: Մեզ համար հիմնական ճանապարհը դա է եղելˋ Պառավաքար-Վազաշեն: Նախ մենք չենք ուզում, որ դա էլ փակվի, որովհետեւ ինչ որ առումով զիջում ենք ադրբեջանցիներին: Իրենք այդ հոգեբանական իրավիճակն են ստեղծում, որ կարողացան փակել մեր հիմնական ճանապարհը»,-նշում է Մելիքյանը:
Ճանապարհների բարեկարգման վերաբերյալ տեղեկատվություն ստանալու համար մենք փորձեցինք կապվել նաեւ ՀՀ տրանսպորտի եւ կապի նախարարության հետ: Նախարարի մամուլի քարտուղար Անահիտ Առաքելյանը պատասխանեց, որ վերը նշված ճանապարհներին այժմ աշխատանքներ են ընթանում եւ մարդիկ աշխատում են: Այդ մասին ավելի մանրամասն մեզ խոստացան հայտնել մամլո հաղորդագրության տեսքով առաջիկա օրերին:
Լիլիթ Առաքելյան
