Երեկ Թուրքիայի խորհրդարանում պատգամավորները ձեռնամարտի են բռնվել։ Վեճը տեղի է ունեցել «Դատավորների և դատախազների բարձրագույն խորհրդի մասին» օրենքում փոփոխություններ մտցնելու օրինագծի քննարկման ժամանակ։ Այս մասին հաղորդում է Sabah-ը։
Օրինագծի քննարկման ընթացքը դժգոհություն է առաջացրել ընդդիմադիր Ժողովրդահանրապետական կուսակցության պատգամավորների շրջանում։ Այնուհետև իշխող «Արդարություն և զարգացում» կուսակցության ներկայացուցիչները հարձակվել են իրենց գործընկերների վրա, սկսվել է ձեռնամարտ, ինչի պատճառով հանձնաժողովի նախագահը հետաձգել է քննարկումը։
Կառավարությունն այս նախաձեռնությունը բերել է խորհրդարան այն բանից հետո, երբ երկրում ծագել է աննախադեպ կոռուպցիոն սկանդալ։ Կառավարությունը ցանկանում է պատժամիջոցներ սահմանել դատավորների և դատախազների համար՝ այս կամ այն գործի վերաբերյալ սխալ որոշումներ կայացնելու համար։
