Ֆիզմաթ գիտությունների դոկտոր Մանե Հակոբյանը մեղադրում է ԱԺ ՀԱԿ պատգամավոր Հրանտ Բագրատյանին գրագողության մեջ:
Նա նշում է, որ 2005-ին հաստատված հեղինակային իրավունքով տպագրել է գիտության, հանրակրթության եւ բարձրագույն կրթության վերաբերյալ իր ծրագիրը:
«Իմ ծրագրից տոտալ գրագողություն է իրականացրել Հրանտ Բագրատյանը եւ Հարություն Կարապետյանը, որ 1997-ին եղել է էկոնոմիկային փոխանախարար: 2011-ին Հրանտ Բագրատյանը եւ Հարություն Կարապետյանը երիտասարդական գիտական շարժման ֆեյսբուքյան էջում տեղադրել էին մի ծրագիր, որի հեղինակները, գրել էին, որ իրենք են: Դա մի ծրագիր է, որը copy-paste տարբերակով վերցված է իմ գրքից»,-ասում է Մանե Հակոբյանը այսօր լրագրողների հետ հանդիպմանը:
Ըստ նրաˋ «գողացված ծրագիրը» վերնագրված է եղել, որպես ՀԱԿ-ի ՀՀ գիտության ոլորտի համակարգային փոփոխման ծրագիր:
«Գրագողությունը տեղի է ունեցել ՀԱԿ սահմաններում, այն ուղեկցվել է խմբակային խարդախությամբ: Գրագողությունը Հրանտ Բագրատյանի եւ Հարություն Կարապետյանի կողմից եղել է 2010-ի սեպտեմբերին»,-ասում է Հակոբյանը:
Իր հեղինակային իրավունքի խախտման պատճառով Մանե Հակոբյանը դիմել է նաեւ դատարան, որի արդյունքում դատարանը վճիռ է կայացրել, որ տեղի է ուեցել նյութերի անբարեխիղճ օգտագործում:
«Հրանտ Բագրատյանը նույնպես ընդունել է, որ գրագողություն է կատարել: Ես փրկել եմ իմ ծրագիրը: Ես թույլ չեմ տա, որ իմ ծրագիրը դառնա ՀԱԿ ծրագիր»,-ասաց Հակոբյանը:
