Այսօր՝ հոկտեմբերի 27-ին, լրագրողների հետ զրույցում ԼՀԿ նախագահ, ԱԺ պատգամավոր Էդմոն Մարուքյանը մեկնաբանել է իր նախկին գործընկեր Արամ Սարգսյանի՝ այսօր հնչեցրած որոշ հայտարարությունները: Անդրադառնալով սպարապետ Վազգեն Սարսգյանի եղբոր այն դիտարկմանը, թե Հոկտեմբերի 27-ի գործը պետք է բացահայտվի կայացած դատաիրավական համակարգի պայմաններում, Մարուքյանը նշել է հետևյալը.
«Արամ Սարգսյանի հայտարարությունը խորը մտածված եւ ողջամիտ քաղաքական դիրքորոշում է։ Կարծում եմ՝ դա պետք է լինի մի այնպիսի փուլում, երբ բոլորս վստահ կլինենք՝ գործընթացը որեւէ ձեւով չի քաղաքականացվի»,-ընդգծել է ԼՀԿ նախագահը։
Մարուքյանի խոսքերով, հնարավոր է՝ սկսվի մի գործընթաց, որից ավելի շատ Նաիրի Հունանյանն օգտվի, քան որեւէ մեկը, եւ ճշմարտությունը ոչ հասարակությունն իմանա, ոչ էլ հարազատները, այսինքն՝ դառնա շահարկման առարկա:
