Ինչպես արդեն հայտնի է 2014 թվականի հունվարի մեկից այլևս հին նմուշի անձանագրեր չեն տրամադրվելու, այլ լինելու են նույնականացման քարտեր և էլեկտրոնային տվյալներ պարունակող կենսաչափական անձնագրեր: Առաջինը կատարելու է հին անձնագրերի գործառույթը, սակայն դրանով հնարավոր չի լինի մեկնել արտերկիր, այլ երկրներ մեկնելու համար անհրաժեշտ կլինի էլեկտրոնային տվյալներ պարունակող կենսաչափական անձանգիր: Նույնականացման քարտեր ստանալու համար քաղաքացիները պետք է վճարեն 3000 դրամ պետտուրք, իսկ էլեկտրոնային տվյալներ պարունակող կենսաչափական անձնագրերի համար վճարը սահմանված է 25000 դրամ:
Բազմաթիվ քաղաքացիների հետաքրքրում է՝ արդյո՞ք հնարավոր է հին նմուշի անձնագրերով, որոնք դեռ վավերական ենˋ մեկնել արտասահմանյան երկրներ: Այս կապակցությամբ ՀՀ ոստիկանության անձնագրերի և վիզաների վարչությունից տեղեկացնում են, որ հին նմուշի անձնագրերը շարունակելու են մնալ գործածության մեջ և դրանցով հնարավոր է նաև արտասահմանյան երկրներ մեկնել, անձնագիրը այլևս չի գործի, երբ լրանա վավերականության ժամկետը։ Այս դեպքում արդեն պետք է ունենալ էլեկտրոնային տվյալներ պարունակող կենսաչափական անձանգիր:
Հիշեցնենք, որ 2012 թվականի հունիսի մեկին ներդրված «Նույնականացման քարտերի մասին» և «ՀՀ քաղաքացու անձնագրերի մասին» օրենքներում փոփոխություններով ուժի մեջ մտան նոր փաստաթղթեր, ներդրվեց նույնականացման քարտերի և էլեկտրոնային տվյալներ պարունակող կենսաչափական անձնագրերի համակարգը, իսկ այս տարվա հունվարի մեկից արդեն նոր համակարգը դարձավ պարտադիր և այլևս հին նմուշի անձնագրեր չեն տրվելու:
