Մենք պատրաստ ենք «Ալիշան» ընկերության ներկայացուցիչների հետ բաց մասնագիտական քննարկում կազմակերպել: Այս մասին Araratnews.am-ին հայտնեց «ՀայՌուսգազարդ» ՓԲԸ-ի հասարակայնության հետ կապերի ղեկավար Շուշան Սարդարյանը:
Հիշեցնենք, որ այսօր «Ալիշան» ՍՊԸ-ի աշխատակիցները լրագրողների հետ հրավիրած ասուլիսում նշել էին, որ «ՀայՌուսգազարդ» ՓԲԸ-ն տարիներ շարունակ անօրինական ձևով լրացուցիչ գումարներ է գանձել իրենց ընկերությունիցˋ սպառած գազի նկատմամբ կիրառելով չափազանց բարձր՝ 1.2-1.9 գործակից:
Նրանք նշում էին, որ նախատեսված 0.9-1 գործակցի փոխարեն ձմռանը կիրառելով մինչև 1.8-1.9 գործակից, «ՀայՌուսգազարդը» 100 հազար խորանարդ մետր լրացուցիչ գազի գումար է շորթել 3 տարում՝ հիմնականում պահածոների արտադրությամբ զբաղվող այս ընկերությունից:
«ՀայՌուսգազարդի» ներկայացուցիչը նշեց, որ իրենք ծանոթացել են «Ալիշան» ՍՊԸ-ի հնչեցրած հայտարարություններին, եւ շատ հարցեր մասնագիտական տեսանկյունից անհասկանալի են:
«Ընդհանուր առմամբ հարցը մասնագիտական ուսումնասիրության կարիք ունի, եւ «Հայռուսգազարդը» պատրաստ է աշխատանքային խումբ ձեւավորել, տեղում ուսումնասիրություններ իրականացնել, ինչպես նաեւ հրավիրել «Ալիշանի» ներկայացուցիչներին բաց մասնագիտական քննարկում կազմակերպելու համար»,-ասում է Սարդարյանը:
Նա նշում է, որ ճիշտ կլիներ հարցը ի սկզբանե քննարկել մասնագիտական հարթակում, եւ չգիտես ինչու «Ալիշան» ընկերությունը նախապատվությունը տվել է հրապարակային հայտարարություններ անելուն:
«Ամեն դեպքում մենք պատրաստ ենք քննարկել, եւ հիմա էլ իրենց գործը ուսումնասիրվում է: Մենք պատարստ ենք հրավիրել մասնագիտական քննարկման մասնագիտական հարթության մեջ եւ ցավում ենք, որ հարցը տանում են այլ ուղղությամբ: Այսինքն` հայտարարություններ են հնչել երկիրը թողնել գնալու, ազգային անվտանգության հարցի եւ այլնի մասին»,-ասաց Սարդարյանը:
Նա հավելեց, որ ուսումնասիրությունն ու քննարկումները ավարտելուց հետո, անհրաժեշտության դեպքում իրենք կտեղեկացնեն լրատվամիջոցներին:
Լիլիթ Առաքելյան
