ՀՖՖ պաշտոնական կայքը տեղեկացնում է, որ ՈՒԵՖԱ-ի 48-րդ համաժողովի ընթացքում, որը տեղի ունեցավ Ղազախստանի մայրաքաղաք Աստանայում, ՈՒԵՖԱ-ն պարգևներ հանձնեց ՈՒԵՖԱ-ի անդամ հինգ ազգային ասոցիացիաներին՝ տարբեր ոլորտներում իրենց գերազանցության համար:
Հայաստանի ֆուտբոլի ֆեդերացիան արժանացավ ՈՒԵՖԱ-ի «Հեթ-տրիկ» կոմիտեի հատուկ մրցանակին՝ «Մանկապատանեկան ֆուտբոլի լավագույն նախագիծ» (Best grassroots project) անվանակարգում: ՀՖՖ կողմից իրականացված «Սպորտի և խաղաղության դպրոցներ» նախագիծը մեծ ազդեցություն է ունեցել Հայաստանում մանկապատանեկան ֆուտբոլի զարգացման վրա՝ նպաստելով նաև սոցիալական խնդիրների կարգավորմանը:
Այլ անվանակարգերում պարգևատրվեցին Չեխիայի (Լավագույն հատուկ նախագիծ), Հյուսիսային Իռլանդիայի (Կանանց ֆուտբոլի զարգացման լավագույն ծրագիր), Իտալիայի (Լավագույն ներդրումային ծրագիր) և Նիդեռլանդների (Լավագույն սոցիալական նախագիծ) ֆուտբոլային գերատեսչությունները:
ՈՒԵՖԱ-ի նախագահ Միշել Պլատինին և ՈՒԵՖԱ-ի «Հեթ-տրիկ» կոմիտեի նախագահ Ալան Հանսենը ՈՒԵՖԱ-ի Չեմպիոնների Լիգայի եզրափակչի գնդակներով պարգևատրեցին Հայաստանի ֆուտբոլի ֆեդերացիայի առաջին փոխնախագահ և գործադիր տնօրեն Արմեն Մինասյանին, Չեխիայի ֆուտբոլային ասոցիացիայի գլխավոր քարտուղար Ռուդոլֆ Ռժեպկային, Հյուսիսային Իռլանդիայի ֆուտբոլի ֆեդերացիայի նախագահ Ջիմ Շոին, Իտալիայի ֆուտբոլի ֆեդերացիայի նախագահ Ջանկառլո Աբետեին և Նիդեռլանդների ֆուտբոլի ֆեդերացիայի նախագահ Միքայել Վան Պրաագին:
