Բոննում գտնվող Կոնվերսիայի միջազգային ինստիտուտը հրապարակել է աշխարհի ամենառազմականացված երկրների վարկանիշային աղյուսակը՝ Global Militarization Index 2013, որում Հայաստանը զբաղեցնում է 4-րդ տեղը: Ընդհանուր առմամբ, ցուցակում ներառված է 149 երկիր:
Նախորդ տարվա համեմատ Հայաստանն առաջադիմել է մեկ տեղով: Կայքը գրում է, որ Հայաստանն առաջադիմել է, քանի որ ինդեքսում հաշվի է առնվել նաև ռեզերվիստների ցուցանիշը: Ինստիտուտի փորձագետները նշում են, որ Կովկասում ռազմականացվածության մեծացումը բացատրվում է Լեռնային Ղարաբաղի հակամարտության իրավիճակի սրմամբ: Ադրբեջանն այս ցուցակում 8-րդն է: Մեր հարևանն առաջադիմել է ևս մեկ տեղով:
Առաջին տեղում Իսրայելն է, երկրորդը` Սինգապուրը, ապա Ռուսաստանը, Հայաստանը, Սիրիան, Հորդանանը, Հարավային Կորեան, Ադրբեջանը, Կիպրոսը, Քուվեյթը:
Ամենաքիչը ռազմական խնդիրներին ուշադրություն են դարձնում Իսլանդիայում, Պապուա Նոր Գվինեայում, Լիբերիայում։
