Կառավարության հինգշաբթի օրվա նիստում ընդունվելու է մի որոշում, որով ապահովվելու է «Հայաստանի Հանրապետության և Եվրոպական միության միջև առանց թույլտվության բնակվող անձանց հետընդունման մասին» համաձայնագրի կիրառումը: Այդ համաձայնագրով Հայաստանի Հանրապետությունը պարտավորվում է քննարկել Եվրոպական Միության անդամ պետության տարածքում առանց թույլտվության բնակվող Հայաստանի Հանրապետության, երրորդ պետությունների քաղաքացիների հետընդունման, ինչպես նաև Հայաստանի Հանրապետության տարածքով երրորդ պետությունների քաղաքացիների տարանցման մասին դիմումները և համաձայնագրով սահմանված ժամկետներում պատասխանել դրանց:
«Տվյալ համաձայնագրում նախատեսված է առանց թույլտվության բնակվող անձանց հետընդունման վերաբերյալ ստացվող դիմումներին պատասխանելու կարճ ժամկետներ` կախված դեպքից` 2 աշխատանքային օրից մինչև 12 օրացույցային օր: Վերոհիշյալից հետևում է որ անհրաժեշտ է հստակ կանոնակարգել այդ դիմումները պետական մարմինների կողմից քննարկելու կարգը և ժամկետները»,- ասված է նախագծի հիմնավորման մեջ:
