Օտարերկրյա զինծառայողները, որոնք պետք է մասնակցեն Հայրենական Մեծ պատերազմում տարած հաղթանակի 75-րդ տարեդարձին նվիրված շքերթին, Ռուսաստան ժամանելուց հետո երկու շաբաթով կկարանտինացվեն, հաղորդում է Gazeta.ru-ն՝ հղում անելով աղբյուրին:
Մինչ օրս տասից ավելի երկիր է հայտարարել Կարմիր հրապարակում անցկացվող շքերթին մասնակցելու մասին: Շքերթի անցկացման վերաբերյալ որևէ փոփոխություն դեռևս չկա, չնայած իրավիճակն ամեն օր փոխվում է:
Առաջին համատեղ փորձը տեղի է ունեցել մարտի 25-ին Ալաբինոյում: Զորահանդեսին նախապատրաստվելու ընթացքում վերահսկվում է յուրաքանչյուր զինծառայողի առողջությունը: Նախատեսված է 18 համատեղ մարզական հավաք և մեկ գլխավոր փորձ: Միևնույն ժամանակ, զորահանդեսի օդային հատվածը կկրճատվի, կցուցադրվեն միայն ավիացիոն տեխնիկայի հեռանկարային մոդելները:
Ավելի վաղ Դմիտրի Պեսկովը հնարավոր էր համարել Հաղթանակի 75-ամյակի շքերթի չեղարկումը, սակայն այժմ տոնակատարության նախապատրաստությունները շարունակվում են:
