Ռուսաստանի Հաշվիչ պալատի նախագահ Ալեքսեյ Կուդրինը RBC-ին տված հարցազրույցում հայտնել է, որ կանխատեսումների համաձայն՝ այս տարի Ռուսաստանում ճգնաժամի պատճառով գործազուրկների թիվը կարող է մի քանի անգամ աճել և հասնել 8 միլիոնի:
Ըստ նրա, 2008-ին իշխանությունների ձեռնարկած աջակցության շնորհիվ հաջողվեց խուսափել այս իրավիճակից։
Կուդրինը նշել է, որ այժմ ամբողջովին անհետացել է ծառայությունների որոշ տեսակների պահանջարկը, դրանք են՝ ռեստորանային ծառայությունները, սպորտի և զվարճանքի վայրերը․
«Ընկերությունները չգիտեն, թե որքան ժամանակ նրանք ստիպված կլինեն այսպես ապրել, նրանք ստիպված են աշխատանքից հեռացնել որոշ մարդկանց»։
Նմանատիպ ճգնաժամ է տիրում նաև այլ երկրներում: Որպես օրինակ, Կուդրինը վկայակոչել է Միացյալ Նահանգները, որտեղ, ըստ նրա, աշխատանքից հեռացողների թիվը պայթյունավտանգ կերպով աճում է ՝ շաբաթական մինչև 700 հազար մարդ: Նրա խոսքով՝ Ռուսաստանում ընկերությունների աշխատակիցների մոտ 30%-ն այժմ ուղարկվում են չվճարվող արձակուրդ, բայց եթե իրավիճակը շարունակվի, կարող են աշխատանքից ազատվել:
Ապրիլի սկզբին պաշտոնյան ՌԴ ղեկավարի հետ հանդիպման ժամանակ նախազգուշացրել է, որ հոռետեսական սցենարով Ռուսաստանի ՀՆԱ-ն կարող է ընկնել 8%-ով, ինչպես 2009-ին եղավ: Այժմ կառավարությունը պահպանում է 1.4 տրիլիոն ռուբլի կամ ՀՆԱ-ի մոտ 1,3% -ը`ճգնաժամի դեմ պայքարելու համար: Կուդրինի հաղորդմամբ՝ այդ ծավալը համարվում է անբավարար:
«Ընդհանուր աջակցության փաթեթը պետք է լինի ՀՆԱ-ի առնվազն 7%-ը», — հարցազրույցում նշում է նա: Ըստ նրա՝ այս իրավիճակում հնարավոր կլինի ավելացնել պետական պարտքը պետական արժեթղթերի լրացուցիչ թողարկման միջոցով:
Հաշվիչ պալատի նախագահը նշում է, որ Ռուսաստանի իշխանությունները լրացուցիչ պետք է երկու-երեք տրիլիոն ռուբլի հատկացնեն ձեռնարկություններին ուղղակի սուբսիդավորման համար, որպեսզի ընկերություններն ու նրանց աշխատակիցները «թեթև անցկացնեն այս դժվարին ժամանակահատվածը»: Ըստ նրա, կառավարությունը քննարկում է այդ որոշումը: Կուդրինը նշեց նաև, որ բանկերին անհրաժեշտ կլինի լրացուցիչ կապիտալ․
«Կենտրոնական բանկը կարծում է, որ բավականաչափ գործոններ ունի այդ բանկերին աջակցելու համար, եթե ինչ-որ բան այն չլինի»։
Մանրամասները՝ տեսանյութում
