Առողջապահության համաշխարհային կազմակերպությունը մեկ օրում կորոնավիրուսի դեպքերի ռեկորդային աճ է արձանագրել։ Վերջին մեկ օրում ավելի քան 183 հազար նոր դեպք է գրանցվել։
Դեպքերի հիմնական մասը Հյուսիսային և Հարավային Ամերիկաներում է հաստատվել։ Ըստ ԱՀԿ-ի՝ հաստատված դեպքերի թիվը մասամբ էլ պայմանավորված է ամբողջ աշխարհում թեստավորումների թվի ավելացմամբ։
Կորոնավիրուսից մահացության եւ վարակի տարածման կտրուկ աճ է նկատվել Բրազիլիայում. տեղական ԶԼՄ-ները հայտնում են, որ համավարակի մեկնարկի օրվանից այստեղ վարակին զոհ է դարձել ավելի քան 50 հազար մարդ: Երկիրը հիմա մահացածների թվով Միացյալ Նահանգներից հետո երկրորդ տեղում է: Բնակիչները վրդովված են իշխանությունների՝ իրենց կարծիքով ո՛չ համարժեք, ո՛չ բավարար գործողություններից:
Հարեւան Իրանում էլ արդեն երրորդ օրն է, որ գրանցվում է ավելի քան 100 մարդու մահ, վարակման՝ մոտ 3 հազար նոր դեպք: Կորոնավիրուսից Մերձավոր Արեւելքում առավել տուժած այս երկրում մայիսի սկզբին մահացության մակարդակը նվազել էր, բայց վերջին շաբաթներին նորից սկսել է բարձրանալ: Իրանի առողջապահության նախարարության խոսնակը հերքել է տեղեկությունները, որ երկիրը համավարակի երկրորդ ալիքն է ապրում՝ ասելով, որ առաջին ալիքը դեռ չի հասել իր գագաթնակետին:
