Հունիսի 5-ին ՀՀ էկոնոմիկայի նախարար Կարեն Ճշմարիտյանն ընդունեց ՀԲ-ի ներկայացուցիչներ ավագ տնտեսագետ Ուլրիխ Բարչին, մասնավոր հատվածի մասնագետ Ֆերի Բորոֆային, ֆինանսական և մասնավոր հատվածի զարգացման ծրագրերի կոորդինատոր Անժելա Պրիգոժինային, ավագ տնտեսագետ Գոհար Գյուլումյանին, տնտեսագետներ Էդգար Կարապետյանին և Տիգրան Կոստանյանին:
Հանդիպմանը մասնակցեցին նաև ՀՀ էկոնոմիկայի նախարարի տեղակալ Սերգեյ Ավետիսյանը, տնտեսական զարգացման քաղաքականության վարչության պետ Արտակ Բաղդասարյանը, նախարարության այլ աշխատակիցներ:
Ողջունելով հյուրերին, նախարարը նշեց, որ բարձր է գնահատում ՀԲ-ի հետ համագործակցությունը և ավելացրեց, որ ծավալած արդյունավետ գործակցությունը շարունակելու համար հարկավոր է առավել հստակեցնել համագործակցության ուղղությունները՝ գոյություն ունեցող ծրագրերի մասով, ամրապնդել ձեռքբերումները, ինչպես նաև գտնել գործակցության նոր ոլորտներ:
Կողմերն անդրադարձան Երկրորդ զարգացման քաղաքականության գործառնության (ԶՔԳ-2) նախապատրաստման շարունակությանը և նախապայման գործողությունների իրականացման առաջընթացին, մասնավորապես ԶՔԳ-2-ի նախապայմաններին ՀՀ էկոնոմիկայի նախարարության մասով, այն է` գործարար միջավայրի բարելավում` /տեսչական բարեփոխումների իրականացում նոր օրենքին համահունչ/ և մրցակցության բարելավում /ավիացիոն ոլորտում նոր ինստիտուցիոնալ կառուցվածքի հստակ տարանջատում քաղաքականությունների սահմանման, իրականացման և վերջիններիս նկատմամբ հսկողության միջև:
Հանդիպման ընթացքում քննարկվեցին հարցեր Երկրի տնտեսական հուշագրի կամ Աճի ուսումնասիրության վերաբերյալ: Նշվեց, որ այս ուսումնասիրությունը երկրների համար իրականացվող կարևորագույն վերլուծական աշխատանք է, որի առանցքային նպատակը աջակցությունն է զարգացման քաղաքականության ընտրությանը և քաղաքական երկխոսության միջոցով միջնաժամկետում աճի մոդելի առաջնահերթ ուղղությունների սահմանումը: Այն նաև հիմք է հանդիսանում ՀԲ-ի հետ գործընկերության շրջանակի ձևավորման և հետագայում դրա ներքո աջակցության առաջնահերթությունների սահմանման համար:
Լայն անդրադարձ եղավ ՀԲ-ի “Առևտրի խթանում և որակի ենթակառուցվածքներ” ծրագրին:
Արծարծվեցին նաև հարցեր ՀԲ-ի հետ համագործակցությանն առնչվող ընթացիկ աշխատանքների, Հայաստանի տնտեսական վիճակի, տեսչական բարեփոխումների, պետական կառավարման համակարգում, ավիացիայի, հանքարդյունաբերության և մի շարք այլ ոլորտներում բարեփոխումների իրականացման, ինչպես նաև հետագա փոխգործակցության ընդլայնման և համատեղ ծրագրերի վերաբերյալ:
