Հինգշաբթի օրվա նիստում կառավարությունը բացասական եզրակացություն կտա Ազգային ժողովի պատգամավորներ Միքայել Մելքումյանի, Բազմասեր Առաքելյանի, Մուրադ Գուլոյանի և Մելիք Մանուկյանի՝ օրենսդրական նախաձեռնության կարգով ներկայացրած «Շահութահարկի մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության օրենքի նախագծին:
Նախագծով առաջարկվում է սահմանել, որ Հայաստանի Հանրապետության կառավարության որոշմամբ հավանության արժանացած գործարար ծրագրի մեկնարկման ու դրան հաջորդող երկու հաշվետու տարիների շահութահարկի գումարը նվազեցվում է գործարար ծրագրի շրջանակներում ստեղծված նոր աշխատատեղերի մասով համապատասխան տարվա ընթացքում հաշվարկված լրացուցիչ աշխատավարձի և դրան հավասարեցված վճարումների 100 տոկոսի, բայց ոչ ավելի, քան համապատասխան հաշվետու տարվա համար հաշվարկված փաստացի շահութահարկի գումարի 50 տոկոսի չափով` ներկայումս գործող 30 տոկոսի փոխարեն:
«Ներկայացված առաջարկության ընդունումը համարում ենք ոչ նպատակահարմար` հետևյալ նկատառումներով:
1. Նախագծի ընդունման հիմնավորմամբ ներկայացված չէ այնպիսի տեղեկատվություն կամ վերլուծություն, որով կհիմնավորվեր վերոնշյալ արտոնության շրջանակներում կիրառվող սահմանաչափի ցածր լինելը: Այս առումով, պարզ չէ, թե արտոնության տրամադրումից մինչև այժմ քանի տնտեսավարող սուբյեկտներ են պատրաստակամություն ունեցել Հայաստանի Հանրապետության կառավարության քննարկմանը ներկայացնել գործարար ծրագրեր, սակայն չեն ներկայացրել` պայմանավորված միայն այն հանգամանքով, որ արտոնության շրջանակներում կիրառվող սահմանաչափը ցածր է: Միաժամանակ, հայտնի չէ, թե որքան աշխատատեղեր պետք է ստեղծվեին այդ ծրագրերի շրջանակներում, որքան լրացուցիչ աշխատավարձ և դրան հավասարեցված վճարումներ պետք է կատարվեին այդ աշխատատեղերի մասով և այդ գումարը համապատասխան հաշվետու տարվա շահութահարկի քանի տոկոսը պետք է կազմեր:
Պարզ չէ նաև, թե ներկայացված առաջարկության ընդունումը ինչպես կազդի արտոնությունից օգտվելու իրավունք ունեցող տնտեսավարող սուբյեկտների վարքագծի վրա և արդյո՞ք արտոնության շրջանակներում կիրառվող սահմանաչափի վերանայումը ինքնանպատակ չի լինի:
Հաշվի առնելով վերոնշյալը` գտնում ենք, որ միայն համապատասխան վերլուծության արդյունքների ու անհրաժեշտ տեղեկատվության առկայության պարագայում կարելի է եզրահանգումներ կատարել արտոնության համար նախատեսված սահմանաչափի մեծության հիմնավորվածության վերաբերյալ:
2. Նախագծի ընդունման հիմնավորման համաձայն, նախագծի ընդունումը կխթանի գործարար ծրագրերի շրջանակներում նոր աշխատատեղերի ստեղծմանը, ինչի արդյունքում կկրճատվի գործազրկության մակարդակը:
Այդ կապակցությամբ, գտնում ենք, որ միայն վերոնշյալ արտոնությունը` առանձին վերցրած, բավարար չէ նոր աշխատատեղերի ստեղծումը խթանելու համար: Մեր կարծիքով այդ արտոնության շրջանակներում կիրառվող սահմանաչափի բարձրացումը որևէ նշանակալի խնդիր լուծել չի կարող` հաշվի առնելով նաև այն հանգամանքը, որ վերոնշյալ արտոնության կիրարկումն ապահավող` Հայաստանի Հանրապետության կառավարության 2013 թվականի մարտի 7-ի «Գործարար ծրագրերի հավանության արժանացման, ինչպես նաև այդ ծրագրերի շրջանակներում ստեղծված նոր աշխատատեղերի մասով լրացուցիչ աշխատավարձի և դրան հավասարեցված վճարումների հաշվարկման կարգը հաստատելու մասին» թիվ 346-Ն որոշումն ուժի մեջ է մտել 2013 թվականի ապրիլի 26-ից, սակայն մինչև այժմ որևէ կազմակերպություն չի դիմել գործարար ծրագրի շրջանակներում ստեղծված նոր աշխատատեղերի մասով շահութահարկի արտոնությունից օգտվելու համար:
Հետևաբար խնդիրը արտոնության համար նախատեսված սահմանաչափի մեծության մեջ չէ: Նոր աշխատատեղերի ստեղծման խթանումը պետք է իրականացվի գործարար միջավայրի շարունակական բարելավման այնպիսի համալիր ծրագրերի շրջանակներում, ինչպիսիք յուրաքանչյուր տարվա համար ընդունվում և իրականացվում են Հայաստանի Հանրապետության կառավարության կողմից»,- ասվում է կառավարության որոշման մեջ:
