Կայազորային կլինիկական հոսպիտալում տեղի ունեցած միջադեպի վերաբերյալ ՊՆ-ն հրաժարվում է նոր տեղեկատվություն տրամադրել։ Araratnews.am-ի թղթակցի հարցին, թե փաստի առթիվ հարուցվել է քրեական գործ, ՀՀ ՊՆ մամլո խոսնակ Արծրուն Հովհաննիսյանը նշեց. «Այս զինծառայողների կարգավիճակը և նրանց հոգեկան վիճակը այնպիսին չէ, որի մասին պետք է այսքան բարձրաձայնել»: «Բացի այդ, միջադեպը ոչ մի ծանր հետևանք չի ունեցել, և փառք Աստծու, զոհեր չկան, հետևաբար նման միջադեպերը ՊՆ-ն չի մեկնաբանում»,- նշել է Արծրուն Հովհաննիսյանը:Հիշեցնենք, որ նոյեմբերի 2-ի երեկոյան, կայազորային կլինիկական հոսպիտալից երկու զինվորներ, որոնք գտնվել են ստացիոնար բուժման մեջ, վիճաբանություն են սկսել նույն բաժանմունքի զինվորների հետ, ինչը վերաճել է ծեծկռտուքի: Նրանք հարձակվել էին նաև հերթապահ բժշկի վրա, այնուհետև՝ դիմել փախուստի, որից հետո ևս երկու զինծառայող դիմել էին փախուստի: Ինչպես ավելի վաղ տեղեկացրել էինք, չորս զինծառայողներն էլ ետ են վերադարձվել, նրանք հոգեբուժական բաժանմունքից են եղել:
Էմմա Պալյան
