Սիգի վաճառքն ապօրինի է, քանի որ դրա որսը թույլատրված չէ: Այս մասին իր տարեկան ամփոփիչ ասուլիսի ժամանակ հայտարարել է ՀՀ շրջակա միջավայրի նախարար Էրիկ Գրիգորյանը։
«Սիգի վաճառքն օրինական լինել չի կարող` անկախ հանգամանքից` այն վաճառվում է մայթերին, խանութում, թե ռեստորանում»,–մանրամասնել է նապարարը: Միաժամանակ, Էրիկ Գրիգորյանը հավաստիացրել է, որ օրենքի փոփոխություններ կկատարվեն հնարավոր սողանցքները փակելու համար։ Այս իմաստով, նախարարը հայցել է քաղաքացիների աջակցությունը, այն է՝ խուսափել ձվադրման շրջանում սիգ գնելուց:
Գերատեսչության ղեկավարը հիշեցրել է նաև, որ ներկայում շրջանառության մեջ է դրվել հրաման, համաձայն որի՝ Գեղարքունիքի մարզպետարանը, բնապահպանության և ընդերքի տեսչական մարմինը, Շրջակա միջավայրի նախարարությունը, ոստիկանությունը և ՊԵԿ–ը պետք է ուսումնասիրեն սիգի ապօրինի վաճառքը։
