տուն Հասարակություն Լվացքի պարանը կտրելու ենք, որ ծառն աճի. քաղաքապետարանի պաշտոնյա

Լվացքի պարանը կտրելու ենք, որ ծառն աճի. քաղաքապետարանի պաշտոնյա

479
0

Երեւանի քաղաքապետարանին առընթեր «Կանաչապատում և շրջակա միջավայրի պահպանություն» ՀՈԱԿ-ը, որը զբաղվելու է կանաչապատման եւ շրջակա միջավայրի խնդիրներով, դեռ կազմավորվում է: Araratnews.am-ին հայտնի դարձավ, որ թափուր հաստիքների մեծ մասն արդեն համալրվել է:

Մեզ հետ զրույցում ՀՈԱԿ-ի տնօրեն Արմեն Բեգոյանն ասաց, որ ընդունում են 12 վարչական շրջանների՝ կանաչապատման պատասխանատու ՓԲԸ-ների  աշխատակիցներին: «Այս պահին 400 աշխատակից է ընդունվել, բայց աշխատակիցների թիվը կլինի 1000»,- մանրամասնեց մեր զրուցակիցը:

Հիշեցնենք՝ մինչ ՀՈԱԿ-ի ստեղծումը Երեւանի 12 վարչական շրջաններում կային ՓԲԸ-ներ, որոնք կանաչապատմամբ էին զբաղված, սակայն քաղաքապետարանի որոշմամբ ստեղծվեց ՀՈԱԿ, որը կիրականացնի աշխատանքները:

ՀՈԱԿ-ը զբաղվելու է նաև վտանգավոր թափոնների հավաքմամբ եւ տեսակավորմամբ: Կառույցի գործունեության ծիծեռնակները տեսանելի կլինեն այս տարվա մարտի կեսերից:

ՀՈԱԿ-ի տնօրենի խոսքով՝ աշխատակիցների աշխատավարձը եւս բարձր կլինի: «Եթե նախկինում բանվորական ուժի աշխատավարձը 80-90.000 դրամ էր, ապա հիմա կլինի մի փոքր ավելի»,- վստահեցրեց մեր զրուցակիցը:

Արմեն Բեգոյանը համաձայն չէ, որ կանաչապատումը մասնավոր սեկտորին պետք է հանձնվեր, որ մրցակցություն լիներ, աշխատանքն էլ՝ տեսանելի: «Տեսնելու ենք գրագետ աշխատանք: Բողոք կար, որ ծառը խանգարում էր լվացքի պարանին, ուստի ծառը պետք է կտրել, սակայն հիմա կտրելու ենք պարանը, որ ծառն աճի: Այդ ծառն էլ պետք է դիզայն ունենա, ինչ-որ ձեւ: Տնկվել են շիվեր, որոնցից բոլորը չէ, որ կպել են»,- մանրամասնեց պաշտոնյան:

Թեեւ ՀՈԱԿ-ն աշխատանքի է ընդունում կանաչապատման լուծարված ՓԲԸ-ների տնօրեններին, սակայն եռամսյա ժամկետով: «Եթե լավ աշխատեն, ապա պայմանագիրը կերկարացվի»,- հավաստիացրեց կանաչապատման պատասխանատուն:

Հնարավո՞ր է ՀՈԱԿ-ն աստիճանաբար ինքնաֆինանսավորվի: Կենտրոնի կանոնադրությամբ դա կարող է լինել եւ որոշակի ծառայություններ անել համեմատաբար մատչելի գնով:

Ի դեպ, եթե նախկինում մայրաքաղաքի կանաչ հատվածներում շիվեր էին տեղադրում, ապա հիմա պատրաստի ծառեր են տնկելու:

Սոնա Դավթյան