«Բարսելոնայի» հավաքականի արգենտինացի հարձակվող Լիոնել Մեսսին և նրա հայրը ստիպված են լինելու ներկայանալու դատարան և պատասխանելու` հարկեր չվճարելու վերաբերյալ իրավապահների հարցերին: Այս մասին հաղորդում է BBC-ն:
26-ամյա Մեսսին մեղադրվում է Իսպանիայում մոտ 4 մլն եվրոյի հարկ չվճարելու մեջ: Համաձայն դատախազության տեղեկությունների` 2007-2009թթ.-ին Մեսսիի ընտանիքն օգտվել է օտարերկրյա ընկերությունների ծառայություններից և Լիոնել Մեսսիի լուսանկարները վաճառել առանց հարկեր վճարելու:
Օգոստոս ամսին Մեսսիները 5 մլն եվրո են վճարել Իսպանիայի բյուջե: Սակայն որոշ տեղեկություններով ընդհանուր չվճարված հարկերի գումարը կազմում է 25 մլն եվրո:
