Վաղարշապատի Գարեգին Նժդեհի անվան 8-րդ դպրոցում երկրորդ օրն է, ինչ դասադուլ և գործադուլ է: Դպրոցի աշակերտների ծնողները մասնավորապես վրդովված են այն հանգամանքից, որ մեկ ձայն պակաս ստացած թեկնածուն նշանակվել է դպրոցի տնօրեն:
Հայտնի է, որ 8 քվեարկողներից 7-ն են մասնակցել տնօրենի ընտրությանը, ինչի արդյունքում 4 ձայն հավաքել է նախկին տնօրեն Եսթեր Գալստյանը, 3 ձայն՝ Շուշանիկ Ոսկանյանը։ Հենց վերջինս էլ նշանակվել է տնօրեն՝ համաձայն մարզպետ Համբարձում Մաթևոսյանի որոշման:
Ակցիայի մասնակիցները, որոնց թվում աշակերտներ են, ուսուցիչներ և ծնողներ, բացատրություն են պահանջում Արմավիրի մարզպետարանից: Նրանց խոսքով, եթե մարզպետարանից ներկայացուցիչներ չժամանեն ու հանդիպեն իրենց հետ, փակելու են Երևան-Էջմիածին մայրուղին:
Իրավիճակն այս պահին լարված է, կրթօջախի տարածքում ծառայություն են իրականացնում ոստիկանները:
