Իսպանիայի հարկային վարչությունն արքայական դատարան է փոխանցել 2013թ.-ի ամռանը բրազիլացի ֆուտբոլիստ Նեյմարի «Սանտոսից» «Բարսելոնա» տեղափոխվելու գործով հետաքննության արդյունքները: Այս մասին հաղորդում է իսպանական Marca-ն:
Պարբերականի տեղեկություններով՝ հետաքննությունն եկել է այն եզրակացության, որ կատալոնական ակումբը կանխամտածված կերպով է թաքցրել 9 միլիոն եվրո պետական հարկը:
Ֆինանսական մեքենայության հիմնական գործող անձը «Բարսելոնայի» արդեն նախկին նախագահ Սանդրո Ռոսելն է, ով ակումբից հեռացել է այս տարվա հունվարին:
«Կապտանռնագույններն» արդեն փոխհատուցել են պետբյուտջեին պատճառված վնասը՝ փոխանցելով 13,5 միլիոն եվրո: Այս փաստը, սակայն, կատալոնացիներին չի ազատում դատական հնարավոր պատասխանատվությանից:
