ԱԺ-ում շարունակվում է Կոռուպցիայի կանխարգելման հանձնաժողովի անդամության թեկնածուի հարցը։ Պատգամավոր Արման Բաբաջանյանը հարց ուղղեց «Բարգավաճ Հայաստան» խմբակցության կողմից առաջադրված թեկնածու Նարեկ Համբարձումյանին, թե ինչ երաշխիքներ է տեսնում, որ հանձնաժողովը զերծ կմնա քաղաքական և կորպորատիվ նեղ շահերից։
«Ես 9 տարի աշխատել եմ մի պաշտոնում, որը պահանջել է միայն լինել օբյեկտիվ։ Ինձ համար հիմնարար սկզբունքներից է, որ օրենքի առաջ բոլորը պատասխանատու են, և ընտրվելու դեպքում աշխատելու եմ նույն սկզբունքով։ Ինձ համար բացարձակ տարբերություն չեն կարող ունենալ կոնկրետ անձանց անունները»,- արձագանքեց թեկնածուն։
Համբարձումյանը հավաստիացրեց, որ կատարելու է միայն օրենքի պահանջը և ոչ թե ինչ-որ բարձրաստիճան պաշտոնյայի ասածները։
Բաբաջանյանն արձագանքեց, որ այս մարմնի ապաքաղաքական լինելը շատ կարևոր է, բայց հիմա ամբողջությամբ հակառակն է արվում, հատկապես կառույցի թեկնածուի ընտրության մասով։
Թեկնածուն խոստացավ լինել ապաքաղաքական։
