Լիլի Էլբակյանի եւ Համո Ադիյանի ընտանիքում այս տարվա Ամանորն առանձնացել է: Դերասանուհու եւ փոքրիկ Էդգարի վատառողջ լինելու պատճառով նրանք ստիպված են եղել չեղարկել ճամփորդությունը: BRAVO.am-ի հետ զրույցում Լիլին պատմել է ջրծաղիկի դրական կողմերի, եթերում քիչ հայտնվելու պատճառի, թատրոնի նորությունների մասին:
Դուբայի փոխարեն Վրաստան
Այս Ամանորը շատ հետաքրքիր անցավ. ծիծաղելի իրավիճակում հայտնվեցինք: Որոշել էինք գնալ Դուբայ, բայց դիմավորեցինք տանն ու ջրծաղիկով հիվանդ: Տղաս հիվանդացավ, ես էլ վարակվեցի: Սպասում էինք նաեւ, որ աղջիկս կհիվանդանա, այդ պատճառով որոշեցինք Վրաստան գնալ: Եթե նույնիսկ Էլմին վարակված լիներ, կարող էինք վերադառնալ. հեռու չէինք: Ավտոմեքենայով գնացինք, լավ ժամանակ անցկացրինք, հետաքրքիր վայրերում եղանք:
Ջրծաղիկի դրական կողմերը
Ամեն տարի Ամանորին շատ զբաղված եմ լինում, քանի որ մանկական տարբեր ներկայացումներ եմ բեմադրում: Ջրծաղիկն ուներ իր դրական կողմերը. բալիկներիս հետ զարդարեցինք տոնածառը, միասին ժամանակ անցկացրինք: Պետք է նաեւ փաստեմ, որ երեխաներիս քիչ ժամանակ չեմ հատկացնում. աշխատում եմ տանը լինել ավելի շատ, քան՝ աշխատանքի վայրում: Չգիտեմ` ինչպես, բայց ստացվում է: Ամուսինս ինձ չի սահմանափակում այդ հարցում, տանը ոչ մի խնդիր չի առաջանում, բայց աշխատում եմ հնարավորինս շատ ժամանակ անցկացնել բալիկներիս հետ: Չեմ ուզում՝ իմ պակասը զգան:
Ա՜խ, այդ նամակները
Ամանորի գիշերը Ձմեռ պապը մեզ հյուր եկավ: Մենք թխվածքաբլիթներ էինք պատրաստել, որոնք նա եւ Ձյունանուշիկը կերել էին ու նվերը շքամուտքում թողել: Բալիկներս նախօրոք նամակներ էին գրել. մի անգամ գցեցինք Խամաճիկների թատրոնի արկղի մեջ, մի անգամ էլ՝ ուրիշ թատրոնի: Այնքան էին ոգեւորվել նամակներով, որ ամեն օր գրում էին: Մենք ասացինք, որ Ձմեռ պապիկն այլեւս չի աշխատում, ու նոր նամակները տեղ չեն հասնի:
Էլմին
«Չեմ կարող»
Միշտ ընդունել եմ այն դերերը, որոնք ինձ դուր են եկել. ամեն դերի չեմ համաձայնել: 25 մասանոց հեռուստադրամաներում նկարահանվելու մի քանի առաջարկ եմ մերժել, հիմնականում բազմասերիանոց նախագծերում նկարահանվելուն չեմ համաձայնում: Ժամանակին շատ առաջարկներ եմ մերժել տարբեր պատճառներով: Հիմա առաջվա պես առաջարկները շատ չեն: Գուցե այնքան եմ մերժել, որ մարդիկ մտածում են՝ կրկին կմերժեմ, դրա համար չեն առաջարկում: Կարծում եմ՝ ավելի լավ է ընդհանրապես չնկարահանվել, քան հանդես գալ ծացրորակ նախագծերում՝ գումարի, ճանաչման համար: Ես ներգրավվում եմ այնպիսի նախագծերում, որոնք ինձ հաճույք կպարգեւեն: Չեմ կարող եթերում անընդհատ լինելու համար համաձայնել ամեն դերի:
«Թատրոնը խորն է»
Այս Ամանորին թատրոնում այնքան տոմսեր էին վաճառվել, որ նույնիսկ դերասանները զարմացել էին: Բոլորը մտածում էին՝ տոնական օրերին ոչ ոք չի գա: Թատրոնը հանդիսատեսի մեծ հոսք ունի: Կար նահանջի շրջան, բայց հիմա Խամաճիկների թատրոն այնքան մարդ է գալիս, որ չենք հասցնում փորձեր անել: Այսօր ինֆորմացիան շատացել է, ու մարդիկ իրականության սով ունեն: Ամեն ինչ ցուցադրական ու ակնթարթային է դարձել, իսկ թատրոնն այնքան իմաստավորված ու խոր երեւույթ է: Մարդը չի կարող անընդհատ արագ սնունդ ուտել. ստեղծագործ է ու արվեստի կարիք ունի: Ես երեխաներիս տանում եմ թե՛ թատրոն, թե՛ պատկերասրահ: Մտածում էի՝ չեն ընկալի, բայց այդպես չէ: Մեր հասարակությունն աստիճանաբար ավելի թատերասեր է դառնում:
Նյութը հրապարակվեց առանց խմբագրման
Աղբյուրը` bravo.am
Շարունակությունը սկզբնաղբյուր կայքում
