2014 թ պետական բյուջեում հարկեր ու Համախառն ներքին արդյունքի (ՀՆԱ) հարաբերակցության աճ այս տարվա՝ 2013-ի համեմատ չի նախատեսվում: Այս տարվա պետական բյուջեում այդ ցուցանիշը նախատեսված էր 21.9%, սակայն արդեն սպասվում է 23.1 % ցուցանիշ: ՀՆԱ-ի համեմատ ճիշտ նույն չափի հարկեր էլ նախատեսվում է 2014թ-ին:
Նշենք, որ Հայաստանի հարկեր/ՀՆԱ ցուցանիշը էականորեն ցածր է մեզ նման տնտեսությամբ երկրների համեմատ: Վրաստանում, օրինակ, հարկային դրույքաչափերն ավելի ցածր են (շահութահարկը` 15%, ԱԱՀ-ն` 18%), քան Հայաստանում (20%, 20%): Բայց Վրաստանում ավելի շատ հարկ է հավաքվում ՀՆԱ նկատմամբ (ավելի քան 25%), քան Հայաստանում (23%): Սա նշանակում է, որ Հայաստանում ստվերային տնտեսության մակարդակը բավականին բարձր է: Ուստի և՛ միջնաժամկետ ծախսերի ծրագրում, և՛ հայտարարությունների մակարդակով միշտ խոսվում էր տարեկան 0,3-0,4 տոկոսային կետով հարկեր/ՀՆԱ հարաբերակցությունը մեծացնելու անհրաժեշտության մասին:
Եվ հանկարծ՝ կառավարությունը հրաժարվում է այդ մտքից: «Հարկեր-ՀՆԱ ցուցանիշը մենք ամեն տարի ավելացնում էինք 0.3-0.4 տոկոսային դրույքով, այս պահին մենք որոշում ենք ընդունում 0.3 տոկոսային կետով 2014 թվականին չավելացնել հարկեր-ՀՆԱ ցուցանիշը»,- հայտարարել էր վարչապետ Տիգրան Սարգսյանը կառավարության նիստի ժամանակ: Իհարկե, վարչապետը ճիշտ չի ասում, երբ ասում է, թե ամեն տարի ավելացրել են հարկեր/ՀՆԱ ցուցանիշը 0,3 տոկոսային կետով: Իրականում այդքան միշտ նախատեսվել է ավելացնել, սակայն չի ավելացվել: Բայց այս անգամ արդեն նաև հայտարարվեց, որ հարկեր/ՀՆԱ-ն ավելացնելու միտք չունեն: Սա ոչ այլ ինչ է, եթե ոչ հրաժարում ստվերային տնտեսության դեմ պայքարից՝ նաև հայտարարությունների մակարդակով:
Հայկ Մանուկյան
