Այսօր «Թրանսփարենսի ինթերնեյշնլ» հակակոռուպցիոն կենտրոնի հայաստանյան ներկայացուցչության անցկացրած կլոր-սեղան քննարկմանըˋ հակակոռուպցիոն մարմինների մոդելների վերաբերյալ, մրցանակ շնորհվեց հասարակական-քաղաքական գործիչ Զառա Հովհաննիսյանին:
Նա ստացավ մրցանակ՝ սկզբունքային ու խիզախ գործունեության եւ քաղաքացիական հասարակության զարգացման գործում նշանակալի ներդրման համար:
Լրագրողների հետ զրույցում նա նշեց, որ իր համար մեծ անակնկալ էր այս մրցանակը:
«Բացի դրանից երբեւէ չեմ ակնկալել, որ ինչ-որ մրցանակների կարժանանամ իմ գործունեության համար, դա իմ կյանքի սկզբունքն էˋ պարզապես պայքարել բռնության դեմ, պայքարել արատավոր երեւույթների դեմ հանրային կյանքումˋ ավելի առողջ հանրային կյանք, ավելի առողջ հանրություն՝ երկրում ունենալու համար»,-ասաց Զառա Հովհաննիսյանը:
Araratnews.am-ի այն հարցին, թե կա՞ն հայ հասարակության մեջ վերջին տարիներին ձեւավորված մեխանիզմներ՝ կոռուպցիայի դեմ պայքարում, Զառա Հովհաննիսյանը պատասխանեց՝ ոչ:
«Ընդհանրապես Հայաստանում այդ գիտակցությունը շատ ցածր է, հենց հանրային գիտակցությունը, քանի որ մենք նկատում ենք հարմարվողականություն՝ հանրային տիրույթում եւ ինչ-որ տեղ նաեւ հանդուրժողականություն՝ կոռուպցիայի նկատմամբ: Դեռեւս շատ մեծ անելիք ունի հանրությունը եւ նաեւ մենք՝ հասկանալու համար, թե ինչպե՞ս պետք է պայքարենք այդ արատավոր երեւույթի դեմ, որը ե´ւ մարդու իրավունքների հանդեպ է խախտում, ե´ւ խաթարում է պետության զարգացումըˋ որպես օրգանիզմի կայուն զարգացում»,-ասաց Հովհաննիսյանը:
