Թուրքիայում տղամարդը կենտրոնական հեռուստաալիքներից մեկով հեռարձակվող ծանոթությունների համար նախատեսված հաղորդման ժամանակ խոստովանել է իր նախկին երկու կանանց սպանությունը։ Գրում է Hurriyet պարբերականը։
62-ամյա Սեֆեր Չալընաքը, որը ողջ թուրքական լսարանին պատմել է իր հանցագործությունների մասին, հայտարարել է, որ ինքը հանգամանքների զոհ է դարձել, և այժմ պատրաստ է նորից ամուսնանալ։
Շոուի հաղորդավարը պնդել է, որ իր հյուրը հեռանա տաղավարից, սակայն տղամարդը հրաժարվել է կատարել նրա պահանջը՝ հայտարարելով, որ կանայք չպետք է իրենից վախենան, քանի որ նա արդեն կյանքից «դասեր է քաղել»։
Հետագայում Չալընաքը թուրք լրագրողներին հայտնել է, որ 14 տարի բանտում է անցկացրել, սակայն երկու դեպքում էլ ազատվել է համաներման շնորհիվ։ Բացի այդ, նա նաև խոստացել է իր ողջ աշխատավարձը տալ այն կնոջը, որը կորոշի դառնալ իր կինը։
