Այսօր՝ սեպտեմբերի 12-ին, իր 75-ամյակն է նշում նշանավոր ջութակահար եւ դիրիժոր, ՌԴ ազգային ֆիլհարմոնիկ նվագախմբի եւ «Մոսկվայի վիրտուոզներ» կամերային խմբի ղեկավար, Մոսկվայի միջազգային երաժշտության տան նախագահ Վլադիմիր Սպիվակովը։
Նա ծնվել է 1944 թվականին՝ հրեաների ընտանիքում։
«Երբ Հայաստանում տեղի ունեցավ երկրաշարժը, մենք համերգ էինք տալիս Ֆլորենցիայում։ Եվ այնտեղ ես տեսա երկու միանձնուհիների. նրանք կանգնած էին մի տուփով, որի վրա գրված էր «Նվիրատվություններ ենք հավաքում Հայաստանի երկրաշարժից տուժածների համար»։ Տուփում ընդամենը 10 հազար լիր էր։ Եվ այդ ժամանակ ես նրանց երեկոյան հրավիրեցի Սբ. Լորենցի եկեղեցի, որտեղ մենք ելույթ ունեցանք, եւ մեր ողջ հոնորարը՝ ավելի քան 50 հազար դոլար, նվիրեցինք այդ բարեգործական կազմակերպությանը, որն էլ գումարը փոխանցել էր Հայաստան»,- իր հարցազրույցներից մեկի ժամանակ պատմել է Սպիվակովը։
Արտիստին Հայաստանի հետ կապում է նաեւ իր անձնական կյանքը՝ հայ կինը՝ դերասանուհի եւ հաղորդավար Սաթի (Սաթենիկ) Սպիվակովան։ Նրանց տարիքային տարբերությունը 18 տարի է։ Սպիվակովները միասին են արդեն շուրջ 35 տարի, ունեն երեք դուստր։
Վլադիմիր Սպիվակովը հաճախ է այցելում Հայաստան, կարծիքներ հայտնում տարբեր թեմաների շուրջ՝ կապված հայկական մշակույթի, պատմության, այդ թվում՝ Ցեղասպանության մասին։
«Ե՛վ տխրության, ե՛ւ վշտի պահին ես միշտ Հայաստանի ժողովրդի հետ եմ։ Այդպես է նաեւ հիմա»,- նշել է Սպիվակովը հարցազրույցներից մեկի ժամանակ։
