Բոլոր այն չորս նախարարները, ում որդիները ներգրավված են վերջերս ծագած կոռուպցիոն սկանդալում, պետք է հրաժարականի դիմում ներկայացնեն և պաշտոնաթող արվեն։ Այս մասին հայտարարել է Թուրքիայի ընդդիմադիր Հանրապետաժողովրդական կուսակցության նախագահ Քեմալ Քըլըջդարօղլուն։ Հաղորդում է Today’s Zaman-ը։ Նա ասել է, որ ոստիկանությունը ճիշտ է գործել, երբ տեղյակ չի պահել վարչապետին կազմակերպվող օպերացիայի մասին։
«Վարչապետ Էրդողանը բողոքում էր, որ իրեն չեն տեղեկացրել կազմակերպվող օպերացիայի մասին։ Բայց դա չէր էլ կարելի անել»,- հայտարարել է Քըլըջդարօղլուն։ Նրա կարծիքով՝ թուրքական հասարակությունը վաղուց կորցրել է ներկայիս կառավարության նկատմամբ վստահությունը․ «Նախարարների որդիները գտնվում են բանտում, սակայն նրանց հայրերը շարունակում են պաշտոնավարել։ Վարչապետ Էրդողանը պետք է որոշում կայացնի»,- ասել է ընդդիմադիր առաջնորդը։
Հիշեցնենք, որ այս շաբաթվա սկզբին Թուրքիայի ոստիկանությունն իրականացրեց լայնածավալ օպերացիա, որի ժամանակ կաշառակերության մեղադրանքով ձերբակալեց 52 մարդ, այդ թվում բարձրաստիճան պաշտոնյաների որդիներ։
