«Զվարթնոց» միջազգային օդանավակայանի տարածքի բնակելի շենքերի և նախկին հանրակացարանների սենյակներում բնակվող բնակիչներին նոր բնակարաններով ապահովելու համար այս տարի շինարարական աշխատանքներ կիրականացվեն: Այս մասին ասվում է կառավարության այս տարվա գործունեության գերակա խնդիրների ծրագրում:
«Ներկայիս «Զվարթնոց» միջազգային օդանավակայանի տարածքում առկա բնակեցված շենքերը հարմար չեն տեղակայված թռիչքային անվտանգության նկատառումներից ելնելով և կարող են խանգարել հետագայում այդ տարածքում ազատ տնտեսական գոտու ենթակառուցվածքները կառուցելու ժամանակ: «Զվարթնոց» միջազգային օդանավակայանի ամբողջական և արդիական շահագործման ապահովման նպատակով՝ անհրաժեշտ է ավարտին հասցնել «Զվարթնոց» միջազգային օդանավակայանին հարակից տարածքում գտնվող բնակելի շենքերի բնակարանների սեփականատերերի և նախկին հանրակացարանների սենյակներում փաստացի բնակվող բնակիչների համար նոր բնակելի շենքերի կառուցման աշխատանքները: Արդյունքում «Զվարթնոց» միջազգային օդանավակայանին հարակից տարածքում գտնվող բնակելի շենքերի բնակարանների սեփականատերերի և նախկին հանրակացարանների սենյակներում փաստացի բնակվող բնակիչների համար կկառուցվեն նոր բնակելի շենքեր, որով կլուծվի 176 ընտանիքների սոցիալական խնդիր»,- ասված է կառավարության այս տարվա գերակայությունների գերակայության հիմնավորման մեջ:
