Արտակարգ դրության ժամանակ ԶԼՄ-ների նկատմամբ սահմանափակումները, հնարավոր է՝ շատ կարճ ժամանակ անց հանվեն։ Այս մասին այսօր՝ մարտի 21-ին, Հանրային հեռուստաընկերության եթերում ասաց Տիգան Ավինյանը՝ անդրադառնալով ԶԼՄ-ների սահմանափակումների էֆեկտիվությունը վիճարկող կարծիքներին եւ դրանք հանելու կոչերին։
«Արտակարգ դրության պայմաններում էական ազդեցություն ունեցող ապատեղեկատվությունը շատ վտանգավոր է եւ կարող է խուճապային տրամադրություններ ստեղծել։ Այնուամենայնիվ, էֆեկտիվության առումով մի բանում պետք է համաձայնեմ, որ կարծում եմ, ընդհանուր առմամբ, այս փուլում մենք ունենք բոլոր կանխարգելիչ գործիքները՝ ապատեղեկատվության դեմ պայքարելու համար։ Չեմ կարծում, թե անվստահություն կա պարետատան, նախարարության, կամ վարչապետի հայտնած տեղեկության նկատմամբ։ Այսօր էլ հանդիպում ենք ունեցել խմբագիրների հետ, դեռեւս չգիտեմ՝ ինչպես են ամփոփել ու ինչ եզրակացություններ են եղել, բայց կարծում եմ՝ հնարավոր է՝ շատ կարճ ժամանակում ԶԼՄ-ների սահմանափակումները հանվեն»,- ասաց Ավինյանը։
