«Մեծ պատմություն փոքր քաղաքում», «Կորած մոլորվածը Հայաստանում», «Քայլ ձիով» ֆիլմերի ամերիկաբնակ ռեժիսոր Գոռ Կիրակոսյանը սեպտեմբերի 19-ին, Երևանում ներկայացնելու է իր նոր՝ «Ազնիվ գողեր»-ը ֆիլմը:
«Ֆիլմն օրիգինալ սցենար է՝ կատակերգական ժանրի մեջ: Մտահաղացումն իմն է, իսկ սցենարը գրվել է «Դեմք» շոուի անդամների մասնակցությամբ: 5 անհաջողակների մասին է, որոնք պատահաբար հանդիպում են ու որոշում գողություն անել, քանի որ իրենց կյանքը շատ վատ է, ամեն մեկն իր խնդիրներն ունի: Որոշում են մի հարուստ մարդու տնից գողանալ Սուլեյման սուլթանի ոսկե, ադամանդե քարերով ջազվեն: Ուզում են, այսպես ասած, ազնիվ գողություն անել. գողանալ, տանել ոստիկանություն, ձեւանալ, որ գտել են ու պարգև ստանալ»,-պատմում է ռեժիսորը:
Ըստ Գոռ Կիրակոսյանի՝ իրենք ֆիլմ են ստեղծել երևանցիների մասին, սակայն ֆիլմը հասկանալու համար հայ լինելը պարտադիր չէ:
«Սա մի պատմություն է, որը կարող էր լինել ցանկացած քաղաքում: Ընտրված հումուրային տարբերակն էլ ժամանակի հետ կապ չունի, այսինքն՝ «Ազնիվ գողեր»ը կարելի է նայել նաև 10 տարի անց և հասկանալ հումորը»,-նշում է ռեժիսորը:
«Ազնիվ գողեր»-ի ստեղծագործական կազմը վստահեցնում է, որ այս ֆիլմը ստեղծվել է լավ տրամադրություն պարգևելու համար:
«Ազնիվ գողեր»ը հատուկ հաղորդագրություն ու ասելիք չունի, այն ավելի շատ «popcorn» ֆիլմ է, այսինքն՝ զվարճանքի համար է նախատեսված: Մենք նախատեսել ենք, որ ֆիլմի շնորհիվ հանդիսատեսը1 ժամ 40 րոպե կկտրվի իր հոգսերից»,-խոստովանում է Գոռ Կիրակոսյանը:
Հավելենք, որ «Ազնիվ գողեր»-ը ֆիլմում նկարահանվել են Արամ MP3-ը, Դավիթ Թովմասյանը, Ռաֆայել Երանոսյանը, Լևոն Տեր-Պետրոսյանը, Մեգգի Գրիգորյանը, Արմեն Դարբինյանը, Արտակ Գասպարյանը, և այլք:
Սեպտեմբերի 19-ից «Ազնիվ գողեր»-ը կարող եք դիտել բոլոր կինոթատրոններում:
